អ៊ីស្លាម៉ាបាដ៖ ទិន្នន័យរបស់រដ្ឋាភិបាលប៉ាគីស្ថានបានបង្ហាញថា មនុស្សជាង ៩ម៉ឺននាក់ត្រូវបានព្យាបាលសម្រាប់ជំងឺឆ្លង និងឆ្លងតាមទឹកក្នុងមួយថ្ងៃនៅក្នុងតំបន់ដែលរងគ្រោះដោយទឹកជំនន់ភាគខាងត្បូងប្រទេសប៉ាគីស្ថាន ខណៈដែលចំនួនអ្នកស្លាប់សរុបពីទឹកជំនន់បានកើនឡើងលើសពី ១៥០០នាក់ហើយ។នេះបើយោងតាមការចុះផ្សាយដោយទីភ្នាក់ងារសារព័ត៌មាន CNA នៅថ្ងៃទី១៧ កញ្ញា ២០២២។

យោងតាមរបាយការណ៍ពីរដ្ឋាភិបាលខេត្ត Sindh ភាគខាងត្បូងដែលបានចេញផ្សាយកាលពីថ្ងៃសុក្រថា តំបន់ទឹកជំនន់បានឆ្លងមេរោគជាច្រើនរួមមានជំងឺគ្រុនចាញ់ គ្រុនឈាម រាគ និងបញ្ហាស្បែក។ អ្នកជំងឺសរុបចំនួន ២.៣ លាននាក់ត្រូវបានព្យាបាល ចាប់តាំងពីថ្ងៃទី ១ ខែកក្កដា នៅក្នុងទីវាល និងមន្ទីរពេទ្យចល័តដែលបង្កើតឡើងនៅក្នុងតំបន់ទឹកជំនន់។

ភ្លៀងធ្លាក់មូសុងនៅភាគខាងត្បូង និងភាគនិរតីនៃប្រទេសប៉ាគីស្ថាន និងការរលាយទឹកកកនៅតំបន់ភាគខាងជើង បានបង្កជាទឹកជំនន់ដែលបានប៉ះពាល់មនុស្សជិត ៣៣ លាននាក់ក្នុងប្រទេសអាស៊ីខាងត្បូងមួយនេះ ដោយគេដឹងថា ប៉ាគីស្ថានមានប្រជាជនសរុប ចំនួន ២២០ លាននាក់។ ទឹកជំនន់បំផ្លាញផ្ទះសម្បែង ដំណាំ ស្ពាន ផ្លូវថ្នល់ និងសត្វពាហនៈក្នុងការខូចខាតប៉ាន់ស្មានថាមានចំនួន ៣០ ពាន់លានដុល្លារ។ 

អាជ្ញាធរជាតិគ្រប់គ្រងគ្រោះមហន្តរាយបានរាយការណ៍ថា មានអ្នកស្លាប់ចំនួន ១៥០៨នាក់ហើយ ក្នុងនោះ រួមមានទាំង កុមារ ៥៣៦ នាក់ និងស្ត្រី ៣០៨ នាក់។ ក្រៅពីនេះ មនុស្សរាប់សែននាក់ដែលត្រូវបានជម្លៀសចេញកំពុងត្រូវការជំនួយយ៉ាងធ្ងន់ធ្ងរលើផ្នែកអាហារ ទីជម្រក ទឹកស្អាត បង្គន់អនាម័យ និងថ្នាំពេទ្យ ហើយមនុស្សជាច្រើនបានដេកនៅទីចំហក្បែរផ្លូវខ្ពស់ៗ៕