កាលពីព្រឹកថ្ងៃពុធ ក្លឹប Chelsea បានធ្វើសេចក្តីថ្លែងការណ៍ដោយផ្ទាល់ថាបាននាំយកកីឡាករវ័យក្មេងដ៏ឆ្នើមពីក្លឹប Dortmund នោះគឺ កីឡាករ Christian Pulisic ។Pulisic ដែលជាខ្សែបម្រើស្លាបជនជាតិអាមេរិកបាន​ផ្ទេរទៅអោយក្លឹបតោខៀវ Chelsea ក្នុងតម្លៃខ្លួនប្រហែល ៥៧.៦ លានផោន។កីឡាករវ័យ ២០ ឆ្នាំរូបនេះនឹងត្រូវបន្តលេងអោយក្លឹប Dortmund នៅឡើយទេក្នុងនាមជាកីឡាករខ្ចីជើងសម្រាប់រដូវកាល ២០១៨/១៩នេះ ហើយនឹងត្រូវទៅលេងនៅក្លឹបថ្មីរបស់ខ្លួននារដូវកាលថ្មីខាងមុខ។លោក Pulisic បាននិយាយថា "នៅរដូវក្តៅខាងមុខ ខ្ញុំនឹងលេងអោយក្រុមតោខៀវ Chelsea ហើយវាជាការប្រកួតប្រជែងថ្មីមួយនៅក្របខ័ណ្ឌ Premier League។ វាគឺជាមោទនភាពមួយដែលបានលេងលើក្លឹបដ៏ល្បីល្បាញមួយនេះ ហើយខ្ញុំនឹងខិតខំកសាងស្នាដៃល្អៗជូនដល់ក្លឹប។"

គួររម្លឹកផងដែរថា Pulisic បានបង្ហាញខ្លួនចំនួន ១១៥ ដងឱ្យក្រុម Dortmund។ គាត់ក៏លេងឱ្យក្លឹប Michigan Rush និង PA Classics នៅស្រុកកំណើតរបស់គាត់ផងដែរ មុនពេលចូលរួមជាមួយ Dortmund ក្នុងវ័យ ១៦ឆ្នាំ នៅឆ្នាំ ២០១៥៕