ក្រសួងសុខាភិបាល បានប្រកាសថា កាលពីថ្ងៃទី២៦ ខែធ្នូ មានករណីវិជ្ជមានវីរុសកូវីដ១៩ថ្មី ចំនួនម្នាក់ ដែលជាអ្នកដំណើរចូលមកកម្ពុជា ដោយមិនពាក់ព័ន្ធនឹងព្រឹត្តិការណ៍សហគមន៍២៨វិច្ឆិកាឡើយ។ នោះគឺបុរសជនជាតិឥណ្ឌូនេស៊ី អាយុ ៤៣ឆ្នាំ មានអាសយដ្ឋាន ស្នាក់នៅសណ្ឋាគារមួយ ក្នុងរាជធានីភ្នំពេញ បានធ្វើដំណើរមកពីប្រទេសសិង្ហបុរី តាមជើងហោះហើរ មកដល់កម្ពុជា នៅថ្ងៃទី២៥ ខែធ្នូ ឆ្នាំ២០២០ ដែលមានលទ្ធផលធ្វើតេស្តវត្ថុសំណាក ផ្តល់ដោយវិទ្យាស្ថានប៉ាស្ទ័រកម្ពុជា គឺវិជ្ជមានវីរុសកូវីដ១៩។ អ្នកជំងឺត្រូវបានដាក់ឲ្យសម្រាកព្យាបាល នៅមជ្ឈមណ្ឌលជាតិកំចាត់រោគរបេង និងហង់សិន ក្នុងរាជធានីភ្នំពេញ។

ក្រសួងសុខាភិបាល បានកត់សម្គាល់ថា អ្នកដំណើរតាមយន្តហោះជាមួយអ្នកជំងឺខាងលើ សរុបមានចំនួន ៥១នាក់។ ក្នុងនោះ អ្នកដំណើរ ៥០នាក់ ផ្សេងទៀត ដែលមានលទ្ធផលតេស្តអវិជ្ជមានវីរុសកូវីដ១៩ ត្រូវបានដាក់ឲ្យធ្វើចត្តាឡីស័ក ចំនួន ១៤ថ្ងៃ នៅសណ្ឋាគារមួយ ក្នុងរាជធានីភ្នំពេញ ចំនួន ២៧នាក់ និងនៅសណ្ឋាគារមួយទៀត ក្នុងរាជធានីភ្នំពេញ ចំនួន ២៣នាក់។

ក្រសួងសុខាភិបាល ក៏បានប្រកាសនៅព្រឹកថ្ងៃទី២៧ ខែធ្នូនេះថា មានករណីជាសះស្បើយពីជំងឺកូវីដ១៩ ម្នាក់ ដែលជាអ្នកដំណើរចូលមកកម្ពុជា ដោយមិនពាក់ព័ន្ធនឹងព្រឹត្តិការណ៍សហគមន៍២៨វិច្ឆិកាទេ។ អ្នកជាសះស្បើយនោះ ជាស្ត្រីជនជាតិខ្មែរ-អាមេរិក អាយុ ៦៦ឆ្នាំ មានអាសយដ្ឋាន ស្នាក់នៅសណ្ឋាគារមួយ ក្នុងរាជធានីភ្នំពេញ ជាអ្នកដំណើរមកពីសហរដ្ឋអាមេរិក បន្តជើងហោះហើរ នៅប្រទេសកូរ៉េខាងត្បូង មកដល់កម្ពុជា កាលពីថ្ងៃទី១៣ ខែធ្នូ ឆ្នាំ២០២០ ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន ២លើក ត្រូវបានអនុញ្ញាតឲ្យចេញពីមណ្ឌលសុខភាពចាក់អង្រែ ក្នុងរាជធានីភ្នំពេញ។

ក្រសួងសុខាភិបាល បានប្រកាសថា កាលពីថ្ងៃទី២៦ ខែធ្នូ ឆ្នាំ២០២០ វិទ្យាស្ថានប៉ាស្ទ័រកម្ពុជា បានធ្វើវិភាគវត្ថុសំណាក ដែលទទួលបាន ចំនួន ៣សំណាក់ ពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា គឺមានលទ្ធផលអវិជ្ជមានវីរុសកូវីដ១៩ ទាំងអស់។ សរុបអ្នកជំងឺកូវីដ១៩ ដែលបានរកឃើញពាក់ព័ន្ធព្រឹត្តិការណ៍សហគមន៍២៨វិច្ឆិកា ពីថ្ងៃទី២៨ ខែវិច្ឆិកា ដល់ថ្ងៃទី២៦ ខែធ្នូ មានចំនួន ៤១នាក់។ ក្នុងនោះ មានអ្នកជាសះស្បើយសរុបចំនួន ៣៧នាក់។

ក្រសួងសុខាភិបាល ក៏បានប្រកាសថា គិតមកដល់ព្រឹកថ្ងៃទី២៧ ខែធ្នូ ឆ្នាំ២០២០ នៅទូទាំងប្រទេស រកឃើញអ្នកឆ្លងជំងឺកូវីដ១៩ សរុបចំនួន ៣៦៤នាក់។ ក្នុងនោះ ៣៥៦នាក់ ត្រូវបានព្យាបាលជាសះស្បើយ និង ៨នាក់ កំពុងសម្រាកព្យាបាល នៅមន្ទីរពេទ្យ៕SP