(អាមេរិក)៖មន្ត្រីសុខាភិបាលសហព័ន្ធបាននិយាយកាលពីថ្ងៃច័ន្ទថា វីរុស​បម្លែងខ្លួន​ថ្មី Omicron បានឆ្លង​នាំមុខគេ​នៃ​ប្រភេទ​វីរុស​បម្លែងខ្លួនថ្មី​ផ្សេងទៀត ហើយឥឡូវនេះក្លាយជាវីរុស​ដ៏មានឥទ្ធិពល​ ​​​នៅក្នុងទឹកដីសហរដ្ឋអាមេរិក ដែលនាំឲ្យករណីឆ្លងថ្មីឡើងដល់ 73% កាលពីសប្តាហ៍មុន ។

មជ្ឈមណ្ឌលគ្រប់គ្រង និងបង្ការជំងឺ សហរដ្ឋអាមេរិក (CDC )បានបង្ហាញពីការកើនឡើងជិត ៦ ដងនៃចំណែកនៃការឆ្លងរបស់វីរុស​បម្លែងខ្លួនថ្មី​ omicron ក្នុងរយៈពេលតែមួយសប្តាហ៍ប៉ុណ្ណោះ។កាលពីថ្ងៃច័ន្ទ​មនុស្សរាប់​រយនាក់​តម្រង់ជួរ​ធ្វើតេស្ត​រកវីរុស​ COVID-19 នៅទូទាំង ទីក្រុង New York ខណៈ​វីរុស​​ ​ កូរ៉ូណា​ បម្លែងខ្លួនថ្មី omicron ​​​ឆ្លងរាលដាល​​​​ និង​សល់​ពេលប៉ុន្មានថ្ងៃទៀត​មុនថ្ងៃបុណ្យ Christmas ។

នៅក្នុងប្រទេស​​ដែល​មានករណីឆ្លង​ និងស្លាប់​ដោយសារវីរុស​កូរ៉ូណា​ច្រើនជាងគេ​  រហូតមកដល់​បច្ចុប្បន្ន​  ករណីឆ្លងវីរុស​បម្លែងខ្លួនថ្មី​​  Omicron មាន​ប្រមាណ ៩០% ឬច្រើនជាងនេះនៅក្នុងតំបន់ New York តំបន់​ភាគអាគ្នេយ៍ តំបន់ឧស្សាហ៍កម្ម Midwest និងតំបន់​ ប៉ាស៊ីហ្វិកភាគពាយ័ព្យ។អត្រាឆ្លងទូទាំង​ប្រទេស​ បានបង្ហាញថាការឆ្លងវីរុស​ បម្លែងខ្លួន​ថ្មី omicron ច្រើនជាង ៦៥០ ០០០ករណី​ បានកើតឡើងនៅក្នុងសហរដ្ឋអាមេរិកកាលពីសប្តាហ៍មុន។

យោងតាមទិន្នន័យរបស់ CDC ចាប់តាំងពីចុងខែមិថុនាមក វីរុស​បម្លែងខ្លួនថ្មី delta ​ គឺជាវីរុស​ដ៏មានឥទ្ធិពល ​ដែលបង្កឱ្យមានការឆ្លង នៅសហរដ្ឋអាមេរិក។ ថ្មីៗនេះ កាលពី​ចុងខែវិច្ឆិកា ជាង ៩៩.៥% នៃការឆ្លងវីរុស​កូរ៉ូណា​​ គឺ វីរុស​បម្លែងខ្លួនថ្មី delta ។

នាយក CDC លោកស្រី វេជ្ជបណ្ឌិត Rochelle Walensky បាននិយាយថា តួលេខថ្មីនេះឆ្លុះបញ្ចាំងពីប្រភេទនៃកំណើនករណីឆ្លង​ដែលបានមើល​ឃើញនៅក្នុងបណ្ដាប្រទេសផ្សេងទៀត៕ ​