ចាប់ពីខែមករា ដល់ខែតុលា ឆ្នាំ២០២២សមត្ថកិច្ចបានចុះត្រួតពិនិត្យគោលដៅចំនួន ៣.០៨០គោលដៅ និងត្រួតពិនិត្យពលករបរទេសចំនួន ៣០.៨៣៤នាក់
ភ្នំពេញ៖ លោកនាយឧត្តមសេនីយ៍ គៀត ចន្ទ័ថារិទ្ធ អគ្គនាយក នៃអគ្គនាយកដ្ឋានអន្តោប្រវេសន៍បានបញ្ជាក់ឱ្យដឹងថា លទ្ធផលការងារអធិការកិច្ចហត្ថពលកម្មបរទេស គិតចាប់ពីខែមករា ដល់ខែតុលា ឆ្នាំ២០២២ បានចុះត្រួតពិនិត្យគោលដៅចំនួន ៣.០៨០គោលដៅ ត្រួតពិនិត្យពលករបរទេស ចំនួន ៣០.៨៣៤នាក់ ព្រមទាំងបានផាកពិន័យជនបរទេសគ្មានបណ្ណការងារចំនួន ២.៤១៦នាក់។
ការលើកឡើងនេះក្នុងរបាយការណ៍ការងារស្តីពីលទ្ធផលការងារ អធិការកិច្ចហត្ថពលកម្មបរទេសគិតចាប់ពីខែ មករាដល់ខែតុលា ឆ្នាំ២០២២ជូនសម្តេចក្រឡាហោម ស ខេង ថ្ងៃចន្ទទី២១ ខែតុលា ឆ្នាំ២០២២។
សម្តេចក្រឡាហោម ស ខេង បានថ្លែងមតិស្វាគមន៍ចំពោះមន្ត្រីពាក់ ព័ន្ធដែលអញ្ជើញចូលរួមកិច្ចប្រជុំនាថ្ងៃនេះ ដើម្បីស្តាប់របាយការណ៍របស់អគ្គនាយកដ្ឋានអន្តោប្រវេសន៍លើកាងារអធិការកិច្ច និងការងារជាច្រើនទៀតលើការងារត្រួតពិនិត្យជនបរទេសដែលស្នាក់នៅ និងធ្វើការ នៅព្រះរាជាណាចក្រកម្ពុជា។ សម្រាប់កិច្ចការងារអធិការកិច្ចរបស់អគ្គនាយកដ្ឋាន អន្តោប្រវេសន៍ ត្រូវបន្តកិច្ចសហការជាមួយសមត្ថកិច្ចពាក់ព័ន្ធនៅក្នុងមូលដ្ឋាន និងក្រុមហ៊ុនរោងចក្រ សហគ្រាស អ្នកវិនិយោគគិននានាផងដែរ។
ក្នុងនោះលោក នាយឧត្តមសេនីយ៍ មានប្រសាសន៍លើកឡើងថា ក្រោមការអនុវត្តប្រកាសអន្តរក្រសួងស្តីពីអធិការកិច្ចហត្ថពលកម្មបរទេសក្នុងព្រះរាជាណាចក្រកម្ពុជា អគ្គនាយកនៃអគ្គនាយកដ្ឋានអន្តោប្រវេសន៍បានសហការជាមួយអគ្គនាយកដ្ឋានការងារនៃក្រសួងការងារ និងបណ្តុះបណ្តាលវិជ្ជាជីវៈចុះធ្វើអធិការកិច្ចហត្ថពលកម្មជារៀងរាល់ឆ្នាំដោយបានរៀបចំក្រុមការងារចុះអធិការកិច្ចនៅតាមបណ្តាក្រុមហ៊ុន រោងចក្រ សហគ្រាស និងគ្រឹះស្ថានឯកជននានាទូទាំងប្រទេស។
ក្រោយបានស្តាប់របាយការណ៍សង្ខេបរួចហើយនោះ សម្តេចក្រឡាហោម ស ខេង បានបង្ហាញការគាំទ្រ គាំទ្រ និងលើកទឹកចិត្តដល់ក្រុមការងារ បន្តអនុវត្តផែនការនេះឱ្យបានហ្មត់ចត់ស្របតាមវិជ្ជាជីវៈ ការទទួលខុសត្រូ និងមានប្រសិទ្ធភាពខ្ពស់ដើម្បីឱ្យឈានដល់គោលដៅដែលយើងចង់បាន៕SP
