ត្រាក់ទ័រសណ្តោងរ៉ឺម៉ក ដឹកមនុស្សច្រើននាក់បានក្រឡាប់ និងធ្លាក់ចូលទៅក្នុងស្រះ នៅភាគខាងជើងប្រទេសឥណ្ឌាបណ្តាលមនុស្សឱ្យ២៦នាក់ស្លាប់
ឥណ្ឌា៖ ក្រុមមន្ត្រីបាននិយាយកាលពីថ្ងៃអាទិត្យថា ត្រាក់ទ័រសណ្តោងរ៉ឺម៉កមួយគ្រឿងរបស់កសិដ្ឋានមានដឹកមនុស្សច្រើននាក់បានក្រឡាប់ និងធ្លាក់ចូលទៅក្នុងស្រះទឹកមួយ នៅភាគខាងជើងប្រទេសឥណ្ឌាបណ្តាលឲ្យមនុស្ស ២៦នាក់ស្លាប់ដែលភាគច្រើនជាស្ត្រី និងកុមារ។
ស្នងការនគរបាលលោក Tej Swaroop Singh បាននិយាយថា ត្រាក់ទ័រសណ្តោងនេះមានដឹកមនុស្សប្រមាណ ៤០នាក់ត្រឡប់មកពីពិធីមួយនៅព្រះវិហារហិណ្ឌូក្នុងតំបន់ក្បែរនោះ ហើយអ្នកស្លាប់ភាគច្រើនគឺដោយសារលង់ទឹក។ យ៉ាងហោចណាស់មនុស្ស ១០នាក់ផ្សេងទៀតបានរងរបួសនៅក្នុងឧបទ្ទវហេតុនៅក្នុងតំបន់ Ghatampur ទីក្រុងKanpur ចម្ងាយប្រហែល ១០០គីឡូម៉ែត្រពីរដ្ឋ Uttar Pradesh។ មូលហេតុនៃគ្រោះថ្នាក់នេះកំពុងស្ថិតក្រោមការស៊ើបអង្កេត។
នាយករដ្ឋមន្ត្រីលោក Narendra Modi បានសរសេរលើបណ្តាញ Twitter នូវសាររំលែកទុក្ខថា «មានទុក្ខដោយឧប្បត្តហេតុត្រាក់ទ័រសណ្តោងនៅទីក្រុង Kanpur។ វាជាឧបទ្ទវហេតុលើកទី២ ក្នុងរយៈពេលបីថ្ងៃចុងក្រោយនេះ ដែលត្រាក់ទ័រដឹកមនុស្សក្រឡាប់បណ្តាលឲ្យមនុស្សយ៉ាងតិច ១២នាក់ស្លាប់។
សូមបញ្ជាក់ថា ឥណ្ឌាជាប្រទេសដែលមានអត្រាមរណៈភាពតាមដងផ្លូវខ្ពស់បំផុតនៅលើពិភពលោក ដោយមានមនុស្សរាប់សែននាក់បានស្លាប់ និងរងរបួសជារៀងរាល់ឆ្នាំ។ គ្រោះថ្នាក់ភាគច្រើនត្រូវបានដាក់កំហុសលើការបើកបរមិនប្រុងប្រយ័ត្ន ការថែទាំផ្លូវមិនល្អ និងយានយន្តចាស់ៗ៕SP
