ប្រេស៊ីល៖ ភ្លៀងធ្លាក់ខ្លាំងបានបណ្តាលឱ្យមានការរអិលបាក់ដីដែលបានសម្លាប់មនុស្សយ៉ាងហោចណាស់ 14 នាក់នៅក្នុងទីក្រុងឆ្នេរសមុទ្រភាគខាងត្បូងនិងតំបន់ Baixada Fluminense នៃរដ្ឋ Rio de Janeiro ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន CNA នៅថ្ងៃទី០៣ មេសា ២០២២។

អាជ្ញាធររដ្ឋបាននិយាយថា ក្រុមអ្នកជួយសង្គ្រោះជាច្រើននាក់ បានជួយមនុស្ស 144 នាក់ទៅកាន់កន្លែងសុវត្ថិភាពនៅក្នុងតំបន់ដែលរងផលប៉ះពាល់។

ទីក្រុង Rio de Janeiro បានរងការវាយប្រហារដោយអាកាសធាតុមិនល្អក្នុងរយៈពេលប៉ុន្មានសប្តាហ៍កន្លងមកនេះ។ អាជ្ញាធរបាននិយាយកាលពីថ្ងៃទី 23 ខែមីនាថា ការរអិលបាក់ដី និងទឹកជំនន់ក្នុងខែកុម្ភៈបានសម្លាប់មនុស្សប្រហែល 240 នាក់នៅក្នុងតំបន់ Petropolis នៅតំបន់ភ្នំខាងលើទីក្រុង Rio de Janeiro ។

លោក Luciano Vidal អភិបាលក្រុង បាននិយាយថាការរអិលបាក់ដីបានបិទផ្លូវ និងផ្នែកដាច់ស្រយាលនៃទីក្រុង ហើយសង្កាត់ទាំងមូលគ្មានអគ្គិសនីប្រើប្រាស់នៅក្នុងទីក្រុងឆ្នេរសមុទ្រ ដែលជាកន្លែងទាក់ទាញទេសចរណ៍។

គួរបញ្ជាក់ថា ទីក្រុងដែលជាគោលដៅទេសចរណ៍បានប្រកាសដាក់រដ្ឋក្នុងគ្រាអាសន្ន ខណៈដែលមានភ្លៀងធ្លាក់កាន់តែខ្លាំងឡើងៗ។RT