អន្តរជាតិ៖ រដ្ឋមន្រ្តីក្រសួងការបរទេស លោក Heiko Maas បាននិយាយកាលពីថ្ងៃច័ន្ទថា ប្រទេសអាឡឺម៉ង់ នឹងបញ្ជូនអុកស៊ីសែននិងជំនួយវេជ្ជសាស្រ្តទៅកាន់ប្រទេសឥណ្ឌា នៅប៉ុន្មានថ្ងៃខាងមុខនេះ ដើម្បីជួយក្នុងការដោះស្រាយវិបត្តិរបស់ប្រទេស។

ជាក់ស្តែង ប្រទេសឥណ្ឌា កំពុងតែទទួលរងនូវការរីករាលដាលនៃការឆ្លងកូរូណាវីរុស ដែលចំនួនករណីបានកើនឡើងដល់ ៣៤៩.៦៩១ នាក់ក្នុងរយៈពេល ២៤ ម៉ោងកន្លងមក ដែលជាថ្ងៃទីបួននៃកំណត់ត្រាខ្ពស់បំផុត។ មន្ទីរពេទ្យកំពុងបង្វែរអ្នកជំងឺចេញ បន្ទាប់ពីអស់អុកស៊ីសែនពីផ្នែកវេជ្ជសាស្ត្រ។

លោក Maas បានប្រាប់កាសែត Rheinische Post ថា "រលកទី ២ បច្ចុប្បន្នកំពុងរំកិលមកលើប្រទេសឥណ្ឌា ជាមួយនឹងថាមពលដែលមិនធ្លាប់មានពីមុនមក"។

យ៉ាងណាម៉ិញ ប្រទេសអាឡឺម៉ង់បានចាត់ថ្នាក់ប្រទេសឥណ្ឌាថា ជាតំបន់ដែលមានអត្រាខ្ពស់នៃការឆ្លងវីរុស ហើយបានដាក់ប្រទេសនេះនៅក្នុងបញ្ជីព្រមានដាច់ដោយឡែកមួយ សម្រាប់វ៉ារ៉្យង់វីរុស។

គួររំលឹកថា ចាប់ពីថ្ងៃច័ន្ទនេះតទៅ ជនជាតិអាល្លឺម៉ង់ដែលធ្វើដំណើរមកពីប្រទេសឥណ្ឌានឹងត្រូវបានអនុញ្ញាតិអោយចូលក្នុងប្រទេសជាមួយនឹងលទ្ធផលនៃការធ្វើតេស្តិ៍អវិជ្ជមាន ហើយបន្ទាប់មកនឹងត្រូវធ្វើចត្តាឡីស័ករយៈពេល ១៤ ថ្ងៃ។ អ្នកទេសចរបរទេសមកពីប្រទេសឥណ្ឌានឹងមិនត្រូវបានអនុញ្ញាតឱ្យចូលប្រទេសអាល្លឺម៉ង់ទៀតទេ។

អ្នកនាំពាក្យក្រសួងការពារជាតិអាឡឺម៉ង់បាននិយាយថា ក្រសួងការបរទេសបានស្នើដល់យោធាដើម្បីរកមើលកន្លែងផលិតអុកស៊ីសែនចល័តក៏ដូចជាការជួយដឹកជញ្ជូនទំនិញបន្ទាន់ និងជំនួយសង្គ្រោះផ្សេងទៀតទៅកាន់ប្រទេសឥណ្ឌា។

គណៈកម្មការអឺរ៉ុបក៏បាននិយាយដែរថា ខ្លួនមានគោលបំណងបញ្ជូនអុកស៊ីសែន និងថ្នាំពេទ្យ ទៅឥណ្ឌា បន្ទាប់ពីទទួលបានសំណើរពី លោក Delhi។ ជាមួយគ្នានេះដែរ ចក្រភពអង់គ្លេស និងសហរដ្ឋអាមេរិក ក៏កំពុងបញ្ជូនជំនួយរួមមានឧបករណ៍វេជ្ជសាស្ត្រទៅកាន់ប្រទេសឥណ្ឌាផងដែរ។