បទបង្ហាញ របស់ វេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាលកម្ពុជា អំពី "ការឆ្លើយតបជំងឺកូវីដ-១៩ នៅកម្ពុជា"
បទបង្ហាញនេះធ្វើ ជូនអង្គការសុខភាពពិភពលោកនៅទីក្រុងហ្សឺណែវដែលមាមវេជ្ជបណ្ឌិត តេដ្រូស អគ្គនាយកអង្គការសុខភាពពិភពលោក ជាប្រធានអង្គប្រជុំ និងបណ្តាប្រទេសជាសមាជិកចូលរួមជាង១២០នាក់ នាថ្ងៃទី១៨ ខែមិថុនា ឆ្នាំ២០២០ វេលាម៉ោង ១៧:៣០នាទី ដល់ម៉ោង ២០:៣០នាទី តាមប្រព័ន្ធអនឡាញ (Teleconference) ដែលមានចំណុចសំខាន់ៗដូចតទៅ ៖
ក. ស្ថានភាពនៃការចម្លងវីរុសកូវីដ-១៩ គឺភាគច្រើននលើសលុបជាករណីនាំចូល ហើយមានការចម្លងបន្តរប៉េះរប៉ោះ ដែលមិនទាន់ចូលដល់ដំណាក់កាលនៃការចម្លងចូលសហគមន៌នៅឡើយទេ។ ករណីឈឺសរុបគិតត្រឹមថ្ងៃទី១៨ ខែមិថុនា ឆ្នាំ២០២០ នេះ មាន ១២៩ករណី មិនមានស្លាប់ បានព្យាបាលជាចំនួន ១២៦នាក់ និងស្ថិតនៅកំពុងព្យាបាលចំនួន ៣នាក់។
ខ. ការទប់ស្កាត់ការចម្លងរាលដាលនៃវីរុសកូវីដ-១៩ នៅក្នុងប្រទេសបានល្អប្រសើរនេះ ដោយសារ កត្តា ៤ សំខាន់ៗ គឺ ៖
១. ការដឹកនាំដ៏ខ្លាំងខ្លា ដោយភាពបើនប្រសព្វ ឈ្លៀសវៃ និងប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា និងការសហការសម្របស្រួលអនុវត្តដោយយកចិត្តទុកដាក់របស់លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ព្រមទាំងថ្នាក់ដឹកនាំ មន្ត្រី បុគ្គលិកសុខាភិបាល ក្រុមគ្រូពេទ្យទាំងអស់ និងការចូលរួមពីស្ថាប័ន ក្រសួងនានា អាជ្ញាថ្នាក់ក្រោមជាតិ វិស័យឯកជន និងបងប្អូនប្រជាពលរដ្ឋទាំងអស់ ដែលនេះជាបែបជ្រើសរើសដ៏ត្រឹមត្រូវ យកការអនុវត្តន៌តាមបែបហៅថា "រដ្ឋាភិបាលទាំងមូល សង្គមទាំងមូល" របស់សម្តេចតេជោនាយករដ្ឋមន្ត្រីកម្ពុជា មានផែនការមេ មានគណកម្មការជាតិ (ដឹកនាំដោយសម្តេចតេជោផ្ទាល់) គណកម្មការអន្តរក្រសួង (ដឹកនាំដោយរដ្ឋមន្ត្រីក្រសួងសុខាភិបាល)គណកម្មការខេត្ត (ដឹកនាំដោយ អភិបាលនៃគណអភិបាលរាជធានី-ខេត្ត) ក្រុមការងារតាមបណ្តាស្ថាប័ន-ក្រសួងនានា ដេីម្បីប្រយុទ្ធនឹងជំងឺកូវីដ-១៩។
២. ការគិតគូរនិងយកចិត្តទុកដាក់ខ្ពស់របស់ប្រមុខរាជរដ្ឋាភិបាលកម្ពុជា លើការវិនិយោគតាំងពីដើមរៀងមកក្នុងវិស័យសុខាភិបាល បានកសាងឲ្យមានប្រព័ន្ធសុខាភិបាលសាធារណ:ប្រកបដោយប្រសិទ្ធិភាព ដែលកម្ពុជាបានចល័តក្រុមឆ្លើយតបបន្ទាន់ (RRT) បានយ៉ាងសកម្ម រហ័ស រុករកករណីឈឺ និងសង្ស័យ ធ្វើការស្វែងរកអ្នកប៉ះពាល់ ជាដើម។ ទន្ទឹមនឹងនោះ ប្រព័ន្ធតាមដានជំងឺឆ្លងជាច្រើន ត្រូវបានប្រើប្រាស់ និងពង្រីកបន្ថែម ដូចជាប្រព័ន្ធហៅចូលទាន់ហេតុការណ៌ Hotline ១១៥ ជាមួយនឹងប្រព័ន្ធតាមដានព្រឹត្តិការណ៌ជាក់ស្តែង និងការតាមដានអ្នកជំងឺបែបផ្តាសាយ និងរលាកផ្លូវដង្ហើម (ILI/SARI) ជាដេីម។ មន្ទីរពិសោធន៌វិទ្យាស្ថានជាតិស្រាវជ្រាវសុខភាពសាធារណ: និងវិទ្យាស្ថានប៉ាស្ទ័រកម្ពុជា មានសមត្ថភាពក្នុងការធ្វើតេស្តរកវីរុសកូវីដ-១៩ បានរហូតដលជាង ២៨.០០០ សំណាកហេីយគិតត្រឹមថ្ងៃនេះ។
៣. ការធ្វើទំនាក់ទំនងលើហានិភ័យ និងការចូលរួមរបស់សហគមន៌ ជាកត្តាចាំបាច់មិនអាចខ្វះបាន និងត្រូវបានជម្រុញអនុវត្តបានយ៉ាងសកម្ម មានការគាំទ្រពេញទំហឹង និងណែនាំដ៏ខ្ពង់ខ្ពស់ពីសំណាក់ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដោយក្រសួងសុខាភិបាល បានផ្សព្វផ្សាយ និងចែកចាយព័ត៌មានតាមរយ:ប្រព័ន្ធបណ្តាញទំនាក់ទំនងសង្គមហ្វេសបុក តាមទូរទស្សន៌ ធ្វើសន្និសីទសារព័ត៌មានជាប់ជាប្រចាំ និងតាមបណ្តាញផ្សព្វផ្សាយសង្គមនានា ព្រមទាំងបោះពុម្ភចែកចាយសារអប់រំសុខភាពទូទាំងប្រទេស បែបជាក្រដាសផ្នត់ ផ្ទាំងរូបធំ វីដេអូឃ្លីប និងបែបជាចម្រៀង បានជាច្រើនវគ្គ ច្រើនសារអប់រំ ។
៤. អ្វីដែលជាចំណុចខ្លាំងមួយដែរនោះ គឺការសាមគ្គីភាពគ្នា និងកិច្ចសហប្រតិបត្តិការអន្តរជាតិជាសាកល ដែលសម្តេចតេជោនាយករដ្ឋមន្ត្រីកម្ពុជាបានប្រកាន់យក ជាពិសេស គឹការសម្រេចចិត្តឲ្យនាវា MS Westerdam ផ្ទុកអ្នកដំណើររាប់ពាន់នាក់ បានចូលសំចតនៅកម្ពុជា ដោយជិតអស់ស្បៀងអាហារ ជិតអស់ប្រេងនាវា និងកង្វះតម្រូវការផ្សេងៗរបស់អ្នកដំណើរលើនាវា ដោយបានអនុវត្តយ៉ាងល្អប្រសើរនូវគោលការណ៌ "បេះដូងមនុស្សធ៌ម សង្គ្រោះអាយុជីវិតមនុស្ស" និងការគោរពសិទ្ធិរស់រានមានជីវិត ដោយមិនប្រកាន់ពូជសាសន៌ ព័ណសម្បុរ វណ្ណ: ឫសាសនា អ្វីទាំងអស់ រួមទាំងការចល័តធនធានក្នុងប្រទេស ដើម្បីប្រយុទ្ធនឹងជំងឺកូវីដ-១៩។ កិច្ចសហការបច្ចេកទេសដោយតម្លាភាព ជាមួយអង្គការសុខភាពពិភពលោក មជ្ឈមណ្ឌលត្រួតពិនិត្យជងឺឆ្លងសហរដ្ឋអាមេរិក វិទ្យាស្ថានប៉ាស្ទ័រកម្ពុជា និងអង្គការដៃគូផ្សេងៗទៀត បានអនុញ្ញាតឲ្យចូលរួមក្នុងការតាមដាន រុករក និងឆ្លើយតបបន្ទាន់ដែរ។ ទន្ទឹមនឹងនោះ មានការគាំទ្រពីដៃគូទ្វេភាគី និងពហុភាគី ពិបណ្តាប្រទេសមួយចំនួន និងវិស័យឯកជនជាច្រើន លើការផ្តល់ជំនួយបច្ចេកទេស និងថវិកា សម្រាប់កិច្ចការប្រយុទ្ធនឹងជំងឺកូវីដ-១៩ ផងដែរ។ ការចូលរួមប្រជុំ បានជាទៀងទាត់ ដើម្បីការចែករំលែកបទពិសោធន៌ និងមេរៀន លើការធ្វើអន្តរាគមន៌ឆ្លើយតបបន្ទាន់ទៅនឹងជំងឺកូវីដ-១៩ របស់កម្ពុជា នៅលើឆាកអន្តរជាតិ ក៏ជាការបង្ហាញដល់មតិសាធារណអន្តរជាតិ នូវសមត្ថភាពនៃការដឹកនាំដ៏ខ្លាំងខ្លាប្រកបដោយឆន្ទះស្រឡាញ់ប្រជាជន និងបេះដូងមនុស្សធ៌មព្រមទាំងការគោរពសិទ្ធិមនុស្សរបស់សម្តេចតេជោ "បុរសខ្លាំងរបស់កម្ពុជា" និងការឆ្លើយតបប្រកបដោយប្រសិទ្ធិភាពនៃក្រុមការងារនានារបស់រាជរដ្ឋាភិបាល ជាពិសេស បានបង្ហាញពីសមត្ថភាពក្រុមគ្រូពេទ្យកម្ពុជា និងក្រសួងសុខាភិបាលកម្ពុជា។
ដោយមិនភ្លេចវីរុសកូវីដ-១៩ កម្ពុជានៅតែបន្តកិច្ចការពាររលកទីពីរដោយយកចិត្តទុកដាក់ខ្ពស់លើការត្រៀមលក្ខណ:សម្រាប់អនាគតនៃការការពារការចម្លងជំងឺនេះ ប្រសិនបើមាន ហើយប្រកាន់យកការប្រុងប្រយ័ត្នជានិច្ចនូវការចម្លងចូលក្នុងសហគមន៌ ដោយសម្លឹងរកកាល:ទេស: ឫឱកាសសម្រាប់ចាប់យកការបន្តពង្រឹងប្រព័ន្ធសុខាភិបាលបន្ថែមទៀតសម្រាប់ពេលអនាគត ក្នុងពេលកំពុងប្រយុទ្ធនឹងជំងឺកូវីដ-១៩ ទោះបីជាស្ថានភាពរាតត្បាតលើសាកលលោកនៅខ្លាំងខ្លានៅឡើយ និងមានភាពមិនច្បាស់លាស់នៃវីរុសនេះក៏ដោយ។
ចុងបញ្ចប់ លោកវេជ្ជបណ្ឌិត ឱ វណ្ណឌីន រដ្ឋលេខាធិការ ជាអ្នកនាំពាក្យក្រសួងសុខាភិបាល និងជាប្រធានក្រុមការងារប្រតិបត្តិការអប់រំ បណ្តុះបណ្តាល និងទំនាក់ទំនងសាធារណ: ដើម្បីប្រយុទ្ធនឹងជំងឺកូវីដ-១៩ បានថ្លែងអំណរគុណយ៉ាងជ្រាលជ្រៅជាទីបំផុតជូនដល់អង្គការសុខភាពិភលោក ដៃគូពាក់ព័ន្ធទាំងអស់ ដៃគូទ្វេ និងពហុភាគីទាំងអស់ បណ្តាប្រទេសជាមិត្តនានា អង្គការជាតិ និងអន្តរជាតិទាំងអស់ ដែលបានជួយជ្រោមជ្រែងដល់កិច្ចការប្រយុទ្ធនឹងជំងឺកូវីដ-១៩ នៅកម្ពុជា និងការយកចិត្តទុកដាក់ទាំងអស់គ្នាក្នុងការទប់ស្កាត់ការរាតត្បាតនៃវីរុសកូវីដ-១៩ ដើម្បីស្រោចស្រង់អាយុជីវិតប្រជាជននៅជុំវិញពិភពលោកយើងនេះ។
ព័ត៌មាន និងបទបង្ហាញរៀបចំដោយ៖
លោក វេជ្ជបណ្ឌិត ឱ វណ្ណឌីន រដ្ឋលេខាធិការ ជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា និងជាប្រធានក្រុមការងារប្រតិបត្តិការអប់រំ បណ្តុះបណ្តាល និងទំនាក់ទំនងសាធារណ: ដើម្បីប្រយុទ្ធនឹងជំងឺកូវីដ-១៩៕
