ករណីសាកទូរស័ព្ទបណ្ដើរចុចលេងបណ្ដើរ ឆក់ស្លាប់លោកយាយម្នាក់ និង របួស៣នាក់ នៅខេត្តស្វាយរៀង ។  

ហេតុការណ៍នេះ កើតឡើងកាលពីវេលាម៉ោង៥៖១៥នាទី ល្ងាចថ្ងៃទី១០ ខែសីហា ឆ្នាំ២០២០ ស្ថិតនៅភូមិមេលោង សង្កាត់ចេក ក្រុងស្វាយរៀង ។  

តាមរបាយការណ៍បឋម ពីសមត្ថកិច្ច បានអោយដឹងថា ស្ត្រីដែលស្លាប់មានឈ្មោះ យស់ ទូច អាយុ៦៥ឆ្នាំ មុខរបរកសិកររស់ក្នុងភូមិសង្កាត់ខាងលើ ។ ស្ត្រីចំណែក អ្នករងរបួសមាន ឈ្មោះចាន់ សេរី អាយុ៦៦ ឆ្នាំមុខរបរកសិករ ឈ្មោះអ៊ាម សុម៉ាឡែន អាយុ១៥ឆ្នាំ មុខរបរសិស្ស និង ឈ្មោះ ទ្រី សុវណ្ណបុប្ផា អាយុ៩ឆ្នាំ មុខរបរសិស្ស រស់ក្នុងភូមិសង្កាត់ខាងលើ ។  

សមត្ថកិច្ច អះអាងថា មុនពេលកើតហេតុ ក្មេងស្រីទាំង២នាក់ បានលេងទូរស័ព្ទ ហើយក៏បានអូសយករ៉ូឡូខ្សែភ្លើង ដែលមានដាច់លៀនចេញសសៃស្រាត ហើយមិនបានចាប់អារម្មណ៍យកមកដាក់សាកថ្មជិតខ្លួន ខណៈកំពុងលេងស្រាប់តែឆ្លងចរន្តភ្លើង បណ្ដាលឲ្យឆក់ ។ 

ឃើញបែបនោះលោកយាយក៏រត់ចូលជួយ បណ្ដាលឲ្យឆក់បន្តបន្ទាប់គ្នាបង្កការភ្ញាក់ផ្អើលដល់បងប្អូនក្រុមគ្រួសារ និងអ្នកភូមិប្រញាប់រត់បិទបារ៉ែតភ្លើង និងជួយសង្គ្រោះលើកដាក់កប់ភក់ និងដឹកមកកាន់មន្ទីពេទ្យ ។ ប៉ុន្តែអកុសលដោយស្ត្រីឈ្មោះ យស់ ទូចមានសភាពធ្ងន់ក៏បានស្លាប់ និង ៣នាក់ត្រូវបានសង្គ្រោះទាន់ពេលវេលា ៕SP