បរទេស៖ អាជ្ញាធរបាននិយាយកាលពីថ្ងៃពុធថា ទឹកជំនន់ និងបាក់ដី ដែលបានបង្កឡើងដោយ​ភ្លៀង​ធ្លាក់ខ្លាំងបានសម្លាប់មនុស្សយ៉ាងហោចណាស់ ១២៩ នាក់ នៅក្នុងប្រទេសរវ៉ាន់ដា (Rwanda) និង ៦ នាក់ នៅអ៊ូហ្គង់ដា (Uganda) ខណៈដែលក្រុមអ្នកជួយសង្គ្រោះបានកំពុងនឹងស្វែង​រកអ្នកដែលរស់​រាន​មា​នជីវិតដែលជាប់នៅក្នុងផ្ទះ។

នៅក្នុងទិដ្ឋភាពដ៏ច្របូកច្របល់បន្ទាប់ពីភ្លៀងធ្លាក់ជាច្រើនសប្តាហ៍នៅក្នុងតំបន់ ឃ្លីបវីដេអូមួ​យដែល​ត្រូវបា​នបង្ហោះដោយទីភ្នាក់ងារផ្សាយរបស់រដ្ឋរ៉ាន់ដា បានបង្ហាញពីទិដ្ឋភាពនៃទឹ​កភក់បានហូរចុះ​មកលើផ្លូ​វដែលជន់លិច និងបំផ្លាញផ្ទះសម្បែងជាច្រើនខ្នង។

យ៉ាងណាម៉ិញ លោក Alain Mukurarinda អ្នកនាំពាក្យរងរដ្ឋាភិបាលនៃប្រទេស រ៉ាន់ដា បាននិយា​យ​ថា អ្ន​កស្លាប់បានកើនឡើងដល់១២៩ នាក់ គិតត្រឹមម៉ោង៣ និង៣០ នាទីរសៀល ម៉ោងក្នុងស្រុក។​ជាងនេះ​ទៀតសោត នៅក្នុងសេចក្តីថ្លែងការណ៍មួយ ប្រធានាធិបតី លោក Paul Kagame បាននិ​យាយថា រដ្ឋាភិបាលរបស់លោកកំពុងជួយប្រជាជនដែលរងផលប៉ះពាល់ រួមទាំងការផ្លាស់ទី​លំនៅបណ្តោះអាសន្នផងដែរ។

ជាមួយគ្នានេះផងដែរ កាកបាទក្រហមរបស់ អ៊ូហ្គង់ដា បាននិយាយថា នៅតំបន់ភ្នំនៃប្រទេសជិតខាង អ៊ូហ្គង់ដា នៅជិតព្រំដែនជាមួយ រ៉ាន់ដា មនុស្ស ៦ នាក់ បានស្លាប់ក្នុងមួយយប់ កាលពីថ្ងៃពុធ នៅក្នុងស្រុក គីសូរូ (Kisoro) ភាគនិរតីនៃអ៊ូហ្គង់ដា។

គួររំលឹកថា ប្រទេសរវ៉ាន់ដា និងអ៊ូហ្គង់ដា បានជួបប្រទះនឹងភ្លៀងធ្លាក់ខ្លាំង និងជាបន្តបន្ទាប់តាំងពីចុង​ខែ​មីនា។ ការរអិលបាក់ដីត្រូវបានគេរាយការណ៍ថាមាននៅក្នុងតំបន់ខ្ពស់ផ្សេងទៀតនៃអ៊ូហ្គង់ដា ដូចជា Kasese នៅជិតភ្នំ Rwenzori ជាកន្លែងដែលទឹកជំនន់ បានបំផ្លាញផ្ទះសម្បែង និងធ្វើអោយមនុ​ស្សរាប់រយនា​ក់ត្រូវផ្លាស់ទីលំនៅ។ NR