អាមេរិក៖ដ្ឋបាលលោក ចូ បៃឌិន គ្រោងនឹងដាក់ ក្រុមហ៊ុនចិនជាង ៣០ ក្នុងនោះរួមទាំងក្រុមហ៊ុន​បច្ចេកវិទ្យា Yangtze Memory Technologies Corp (YMTC) ទៅក្នុងបញ្ជីខ្មៅពាណិជ្ជកម្ម ដែលនឹងរារាំងពួកគេពីការទិញគ្រឿងបន្លាស់មួយចំនួនពីអាមេរិក ដែលបង្កភាពតានតឹ​ង​កាន់តែ​ខ្លាំងវាងមហាអំណាចសេដ្ឋកិច្ចទាំងពីររបស់ពិភពលោក។ 

ក្រសួងពាណិជ្ជកម្មអាមេរិក នឹងបន្ថែមក្រុមហ៊ុនផលិតបន្ទះឈីបអង្គចងចាំឈា​នមុខគេរបស់ប្រទេ​ស​ចិន និងក្រុមហ៊ុនផ្សេងទៀតទៅក្នុងបញ្ជីខ្មៅនៅ​សប្តាហ៍នេះ។ក្រុមហ៊ុនដែលអា​មេរិកគ្រោងដាក់​​នៅ​ក្នុងប​ញ្ជីខ្មៅទាំងនេះ ត្រូវបានរារាំងពីការទិញបច្ចេកវិទ្យាពីអ្នកផ្គត់ផ្គង់របស់សហរដ្ឋអាមេរិក លុះត្រាតែ​ពួកគេទទួលបានអាជ្ញាប័ណ្ណនាំចេញពិសេស។

ចំណាត់ការរបស់អាមេរិកនេះ នឹងជំរុញឲ្យមានការកើនឡើងកម្តៅនៅក្នុងជម្លោះរវាងសហរដ្ឋអាមេរិក និងចិ​នជុំវិញបច្ចេកវិទ្យា។ រដ្ឋបាលលោក បៃឌិន បានបង្ហាញការរឹតបន្តឹងយ៉ាងខ្លាំងលើលទ្ធភាពរ​បស់​ចិនក្នុងការទិញឧបករណ៍អេឡិចត្រូនិក និងឧបករណ៍ផលិតបន្ទះឈីប កាលពីខែតុលា ដោយដា​ក់ក្រុមហ៊ុនបច្ចេកវិទ្យា YMTC និងក្រុមហ៊ុនចំនួន ៣១ផ្សេងទៀតរបស់ចិននៅក្នុងបញ្ជីដែល «មិនអាចត្រួតពិនិត្យបាន»។

ក្រុមហ៊ុនបច្ចេកវិទ្យា YMTC ដែលមានមូលដ្ឋាននៅទីក្រុង Wuhan គឺជាក្រុមហ៊ុនផលិតឧបករណ៍​អេឡិចត្រូនិក 3D NAND ដ៏ធំបំផុតរបស់ប្រទេសចិន ដែលផលិតបន្ទះឈីបអង្គចងចាំ សម្រាប់ដា​ក់​ទៅក្នុងស្មាតហ្វូន និងឧបករណ៍កុំព្យូទ័រផ្សេងទៀត ក្នុងការប្រកួតប្រជែងជាមួយនឹងក្រុមហ៊ុន Samsung Electronics Co. របស់កូរ៉េខាងត្បូង ដែលជាក្រុមហ៊ុនផ្គត់ផ្គង់ដ៏ធំមួយដល់ក្រុមហ៊ុនបច្ចេកវិទ្យាយ​ក្សអាមេរិក Apple Inc។ 

សហរដ្ឋអាមេរិក បាន និងកំពុងដាក់កំហិតបន្ទះឈីប ជាទិសដៅដ៏សំខាន់បំផុត ដើម្បីបញ្ឈប់ប្រទេ​សចិនពីកា​រក្លាយជាការគំរាមកំហែងផ្នែកសេដ្ឋកិច្ច និងយោធា។

 ប្រទេសចិនបានរិះគន់យ៉ាងខ្លាំងចំពោះទង្វើរបស់សហរដ្ឋអាមេរិក ដោយលើកហេតុផលថា រដ្ឋាភិបា​លអា​មេរិកកំពុងព្យាយាមបញ្ឈប់ការរីកចម្រើនរបស់ខ្លួន។ នៅសប្តាហ៍នេះ ប្រទេសចិនបានប្តឹងជំ​ទាស់​ទៅអង្គការពាណិជ្ជកម្មពិភពលោក ជុំវិញទង្វើរបស់អាមេរិកមកលើវិស័យបច្ចេកវិទ្យាចិន ដោយលើ​កហេតុផលថាពួកគេនឹងរំខានដល់ពាណិជ្ជកម្មពិភពលោក៕SP