លោក Bill Gates បរិច្ចាគ២០ពាន់លានដុល្លារដល់មូលនិធិផ្ទាល់ខ្លួន ដើម្បីកាត់បន្ថយទុក្ខលំបាកមួយចំនួនដែលពិភពលោកកំពុងជួបប្រទះ
អាមេរិក៖ លោកមហាសេដ្ឋី Bill Gates បានប្រកាសកាលពីថ្ងៃពុធថាបានបរិច្ចាគ ២0 ពាន់លានដុល្លារដល់មូលនិធិ Bill & Melinda Gates ។នេះបើតាមការចេញផ្សាយដោយសារព័ត៌មានCNBCនៅថ្ងៃទី១៥ ខែកក្កដា ឆ្នាំ២០២២។
សហស្ថាបនិកក្រុមហ៊ុន Microsoft ដែលជាមហាសេដ្ឋីទីបួនរបស់ពិភពលោកបាននិយាយនៅក្នុងTwitter ផ្ទាល់ខ្លួនថា "វិបត្តិសកលដ៏ធំជាច្រើនបានកើតឡើងក្នុងរយៈពេលប៉ុន្មានឆ្នាំចុងក្រោយនេះ បានធ្វើឱ្យមនុស្សជាច្រើនបាក់ទឹកចិត្ត និងងឿងឆ្ងល់ថាតើពិភពលោកនឹងមានវាសនាកាន់តែអាក្រក់ឬយ៉ាងណា"។
លោក Gates បាននិយាយនៅក្នុងសេចក្តីថ្លែងការណ៍មួយដោយប្រកាសពីការសន្យាថា "ខ្ញុំសង្ឃឹមថាតាមរយៈការផ្តល់ឱ្យកាន់តែច្រើន យើងអាចកាត់បន្ថយទុក្ខលំបាកមួយចំនួនដែលពិភពលោកកំពុងជួបប្រទះនៅពេលនេះ ដើម្បីឱ្យមនុស្សគ្រប់រូបមានឱកាសក្នុងការរស់នៅប្រកបដោយសុខភាពល្អ និងប្រកបដោយផលិតភាព"។
សូមបញ្ជាក់ថា ឥឡូវនេះមូលនិធិនេះគ្រោងនឹងបង្កើនការចំណាយប្រចាំឆ្នាំរបស់ខ្លួនដល់ ៩ ពាន់លានដុល្លារនៅឆ្នាំ២០២៦ដែលនេះជាការកើនឡើង៥០% ជាងកម្រិតមុនការរាតត្បាត។ ការបរិច្ចាកនេះបាននាំមកនូវអំណោយរបស់មូលនិធិដល់ទៅប្រហែល៧០ពាន់លានដុល្លារ៕SP
