សេអ៊ូល៖កូរ៉េខាងជើងបានច្រានចោលការអះអាងរបស់សហរដ្ឋអាមេរិកថា ខ្លួនកំពុងដឹកជញ្ជូនអាវុធដោយសម្ងាត់ទៅឱ្យរុស្ស៊ីសម្រាប់សង្គ្រាមនៅអ៊ុយក្រែន ដោយនិយាយថា ខ្លួនមិនដែលលក់អាវុធឱ្យទីក្រុងមូស្គូ និងមិនមានគម្រោងធ្វើដូច្នេះទេនោះទេ។នេះបើតាមការចេញផ្សាយដោយសារព័ត៌មានAljazeera នៅថ្ងៃទី០៨ ខែវិច្ឆកា ឆ្នាំ២០២២។

សេចក្តីថ្លែងការណ៍កាលពីថ្ងៃអង្គារលើទីភ្នាក់ងារសារព័ត៌មានកណ្តាលកូរ៉េ (KCNA) ធ្វើឡើងបន្ទាប់ពីអ្នកនាំពាក្យសន្តិសុខជាតិសេតវិមានលោក John Kirby បាននិយាយកាលពីសប្តាហ៍មុនថា សហរដ្ឋអាមេរិកមានព័ត៌មានដែលបង្ហាញថាកូរ៉េខាងជើងកំពុងផ្គត់ផ្គង់ដល់ប្រទេសរុស្ស៊ីនូវចំនួនគ្រាប់កាំភ្លើងធំ ។

មន្ត្រីក្រសួងការពារជាតិកូរ៉េខាងជើងម្នាក់បានហៅការចោទប្រកាន់នេះថាជា "ពាក្យចចាមអារ៉ាម" ហើយបាននិយាយថា ទីក្រុងព្យុងយ៉ាង "មិនដែលមាន "ការដោះដូរអាវុធ" ជាមួយរុស្ស៊ីទេ ហើយមិនមានផែនការធ្វើដូច្នេះនៅពេលអនាគត។

លោកបាននិយាយថា ប្រទេសកូរ៉េខាងជើងកំពុងព្យាយាមបិទបាំងការនាំចេញតាមរយៈការបញ្ជូនទំនិញទាំងនោះឆ្លងកាត់ប្រទេសនៅមជ្ឈិមបូព៌ា និងអាហ្វ្រិកខាងជើង ហើយថាទីក្រុងវ៉ាស៊ីនតោនកំពុងតាមដានដើម្បីមើលថាតើការដឹកជញ្ជូនត្រូវបានទទួល។

មន្ត្រីរូបនេះបាននិយាយនៅក្នុងសេចក្តីថ្លែងការណ៍មួយថា "យើងចាត់ទុកទង្វើបែបនេះរបស់សហរដ្ឋអាមេរិកជាផ្នែកមួយនៃការប៉ុនប៉ងធ្វើឱ្យខូចមុខមាត់របស់កូរ៉េខាងជើងនៅក្នុងឆាកអន្តរជាតិ ដោយការហៅ "ដំណោះស្រាយទណ្ឌកម្ម" ខុសច្បាប់របស់ក្រុមប្រឹក្សាសន្តិសុខអង្គការសហប្រជាជាតិប្រឆាំងនឹងកូរ៉េខាងជើង" ។

ការស្តីបន្ទោសនេះកើតឡើងចំពេលមានភាពតានតឹងកាន់តែខ្លាំងឡើងនៅលើឧបទ្វីបកូរ៉េ បន្ទាប់ពីកូរ៉េខាងជើងបានធ្វើតេស្តអាវុធជាបន្តបន្ទាប់កាលពីសប្តាហ៍មុន រួមទាំងមីស៊ីលផ្លោងអន្តរទ្វីប (ICBM) ខណៈដែលសហរដ្ឋអាមេរិក និងកូរ៉េខាងត្បូងបានធ្វើសមយុទ្ធទ័ពអាកាសដ៏ធំបំផុតមិនធ្លាប់មានរបស់ពួកគេ៕