ប្រទេសកូរ៉េខាងជើងបាញ់មីស៊ីលបាលីស្ទិក៣គ្រាប់ចំពេលមានការស្លាប់និងការផ្ទុះការរីករាលដាលជំងឺកូវីដ១៩ក្នុងប្រទេស
កូរ៉េខាងត្បូង៖ ប្រទេសកូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួន ៣ គ្រាប់ទៅកាន់សមុទ្រកាលពីថ្ងៃព្រហស្បតិ៍ ខណៈប្រទេសនេះក៏កំពុងផ្ទុះការរីករាលដាល នៃវីរុសកូវីដ១៩។នេះបើតាមការចេញផ្សាយរបស់សារព័ត៌មានABCនៅថ្ងៃទី១៣ ខែឧសភា ឆ្នាំ២០២២។
ការបាញ់បង្ហោះនេះ អាចបញ្ជាក់ពីការប្តេជ្ញាចិត្តរបស់កូរ៉េខាងជើងក្នុងការជំរុញទៅមុខជាមួយនឹងការខិតខំប្រឹងប្រែងរបស់ខ្លួនក្នុងការពង្រីកឃ្លាំងអាវុធ បើទោះបីជាមានការផ្ទុះឡើងនៃមេរោគកូវីដ១៩ក៏ដោយ។កូរ៉េខាងត្បូង ជប៉ុន និងសហរដ្ឋអាមេរិក បានថ្កោលទោសការសាកល្បងអាវុធនេះ ។
ទីប្រឹក្សាសន្តិសុខជាតិរបស់សេតវិមានលោក Jake Sullivan បានថ្កោលទោសការបាញ់បង្ហោះនេះ នៅ ពេលដែលលោកបាននិយាយតាមទូរស័ព្ទជាមួយសមភាគីកូរ៉េខាងត្បូង គឺលោក Kim Sung-han។ នេះបើយោងតាមសេចក្តីថ្លែងការណ៍របស់សេតវិមាន។ អ្នកទាំងពីរក៏បានពិភាក្សាអំពីដំណើរទស្សនកិច្ចរបស់ប្រធានាធិបតី Joe Biden ទៅកាន់ប្រទេសកូរ៉េខាងត្បូងនៅសប្តាហ៍ក្រោយ ដែលជាលើកទីមួយរបស់លោក Biden ទៅកាន់ប្រទេសអាស៊ីក្នុងពេលដែលលោកធ្វើជាប្រធានាធិបតី។
នៅព្រឹកថ្ងៃព្រហស្បតិ៍ ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានបញ្ជាក់ពីការឆ្លងជំងឺ COVID-19 លើកដំបូងរបស់ប្រទេសនេះ ខណៈដែលលោក គីម បានបញ្ជាឱ្យបិទប្រទេសទូទាំងប្រទេស ដើម្បីកាត់បន្ថយការរីករាលដាលនៃមេរោគនេះ ហើយ លោក គីម ក៏បានបញ្ជាឲ្យមន្ត្រីពង្រឹងជំហរការពារប្រទេសដើម្បីបញ្ចៀសភាពខ្វះចន្លោះផ្នែកសន្តិសុខ។
ក្នុងរយៈពេលប៉ុន្មានខែថ្មីៗនេះ កូរ៉េខាងជើងបានបាញ់សាកល្បងកាំជ្រួចមីស៊ីលមួយប្រភេទ ដែលអ្នកជំនាញហៅថា ការប៉ុនប៉ងធ្វើទំនើបកម្មអាវុធរបស់ខ្លួន និងដាក់សម្ពាធលើសហរដ្ឋអាមេរិក និងសម្ព័ន្ធមិត្តឱ្យ ។ អ្នកសង្កេតការណ៍ខ្លះនិយាយថា ទោះបីជាមានការកើនឡើងនូវជំហានប្រឆាំងមេរោគកូវីដ១៩ក៏ដោយ ក៏កូរ៉េខាងជើងទំនងជានឹងបន្តសាងសង់ឃ្លាំងអាវុធរបស់ខ្លួន ៕SP
