មីយ៉ាន់ម៉ា៖តុលាការយោធាមួយបានកាត់ទោសប្រហារជីវិតនិស្សិតប្រាំពីរនាក់កាលពីសប្តាហ៌មុន បន្ទាប់ពីរកឃើញថាពួកគេមានពិរុទ្ធពីបទឃាតកម្មលើមន្ត្រីយោធាចូលនិវត្តន៍ម្នាក់កាលពីដើមឆ្នាំនេះ។ ទណ្ឌិតដែលត្រូវបានកាត់ទោស ដែលសុទ្ធសឹងជានិស្សិតនៃសាកលវិទ្យាល័យ ដាហ្គន ត្រូវបានកាត់ទោសពីបទសមគំនិតក្នុងអំពើឃាតកម្ម និងផ្តន្ទាទោសតាមមាត្រា៣៤ និង៣០២ នៃក្រមព្រហ្មទណ្ឌ។

ពួកគេត្រូវបានចោទប្រកាន់ពីបទបាញ់សម្លាប់លោក Saw Moe Win ដែលជាវរសេនីយ៍ទោចូលនិវត្តន៍នៅមុខសាខា South Dagon នៃធនាគារ Global Treasure Bank ដែលគាត់បានគ្រប់គ្រងកាលពីខែមេសា។

នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃព្រហស្បតិ៍ សម្ព័ន្ធសហជីពនិស្សិត-Yangon បានថ្កោលទោសការកាត់ទោសប្រហារជីវិតដោយនិយាយថារបបយោធាកំពុងប្រើប្រាស់ "ប្រព័ន្ធតុលាការពុករលួយរបស់ខ្លួនដើម្បីសម្លាប់មនុស្ស" ។ ក្រុមនេះបាននិយាយថា "យើងជំទាស់និងថ្កោលទោសការកាត់ទោសប្រហារជីវិតដោយ តុលាការដែលកំពុងដើរតួជាសសរស្តម្ភនៃរបបយោធាភេរវករ" ដោយបន្ថែមថាខ្លួនកំពុងតាមដានស្ថានការណ៍យ៉ាងដិតដល់ ៕SP