ដឹកនាំក្រុមឆេតឈ្នីបានជំរុញទីក្រុង Moscow ឱ្យពិចារណាការដាក់ពង្រាយអាវុធនុយក្លេអ៊ែរខ្នាតតូចនៅក្នុងប្រទេសអ៊ុយក្រែន
រុស្ស៊ី៖ មេដឹកនាំក្រុមឆេតឈ្នី លោក Ramzan Kadyrov កាលពីចុងសប្ដាហ៍នេះបានជំរុញទីក្រុង Moscow ឲ្យពិចារណាការដាក់ពង្រាយអាវុធនុយក្លេអ៊ែរខ្នាតតូចនៅក្នុងប្រទេសអ៊ុយក្រែន បន្ទាប់ពីកងកម្លាំងរុស្ស៊ីបានដកថយពីទីក្រុង Lyman។
នៅក្នុងការបង្ហោះសារលើបណ្ដាញ Telegram លោក Kadyrov បាននិយាយថា លោកជឿថា វិធានការមានប្រសិទ្ធភាពជាច្រើនគួរតែត្រូវបានអនុវត្តន៍ ស្របតាមការប្រកាសច្បាប់អាជ្ញាសឹកនៅតាមតំបន់ព្រំដែន និងការប្រើប្រាស់អាវុធនុយក្លេអ៊ែរខ្នាតដែលមានកម្លាំងត្រឹម ១០គីឡូតោន។
លោក Kadyrov គឺជាសម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ីលោក Vladimir Putin ដែលបានតែងតាំងលោកឲ្យគ្រប់គ្រងតំបន់ឆេតឈ្នី ក្នុងឆ្នាំ២០០៧។ ការអត្ថាធិប្បាយរបស់លោកមានឡើង បន្ទាប់ពីរុស្ស៊ីបាត់បង់មូលដ្ឋានរឹងមាំនៃទីក្រុង Lyman ក្នុងភាគខាងកើតអ៊ុយក្រែន ក្រោយការវាយបកដ៏ខ្លាំងក្លាពីកងកម្លាំងអ៊ុយក្រែន។ រុស្ស៊ីមានឃ្លាំងអាវុធបរមាណូធំជាងគេបំផុតក្នុងពិភពលោក រួមទាំងអាវុធនុយក្លេអ៊ែរតាកទិកដែលបានផលិតឡើងសម្រាប់ប្រឆាំងសត្រូវ៕SP
