លោក Putin ៖ការដាក់ទណ្ឌកម្មរបស់លោកខាងលិច មិនបះពាល់ដល់ការអភិវឌ្ឍន៍របស់រុស្ស៊ីនោះទេ ព្រោះទណ្ឌកម្មមិនអាចកាត់ផ្ដាច់រុស្ស៊ីពីពិភពលោកបានឡើយ
រុស្ស៊ី៖ លោក Vladimir Putin ប្រធានាធិបតីរុស្ស៊ីបាននិយាយកាលពីថ្ងៃចន្ទថា វាមិនអាចទៅរួចនោះទេក្នុងការកាត់ផ្ដាច់រុស្ស៊ីចេញពីពិភពលោកទាំងមូល ហើយទណ្ឌកម្មរបស់លោកខាងលិចនឹងមិនរុញច្រានការអភិវឌ្ឍន៍របស់ទីក្រុងមូស្គូ ឱ្យដើរថយក្រោយរាប់ទសវត្សរ៍នោះទេ។ នេះបើតាមការចេញផ្សាយដោយសារព័ត៌មានBBCនៅថ្ងៃទី ១៩ ខែកក្កដា ឆ្នាំ២០២២។
ថ្លែងនៅក្នុងសន្និសីទតាមវីដេអូជាមួយឥស្សរជនរដ្ឋាភិបាល លោក Putin បាននិយាយថា មិនត្រឹមតែការរឹតត្បិតប៉ុណ្ណោះទេ ប៉ុន្តែស្ទើរតែបិទទាំងស្រុង មិនឱ្យទទួលបានផលិតផលបច្ចេកវិទ្យាជាន់ខ្ពស់បរទេស ដែលកំពុងត្រូវបានប្រើប្រាស់ជាចេតនាមកលើប្រទេសរបស់យើង។
រដ្ឋមន្ត្រីក្រសួងហិរញ្ញវត្ថុលោក Anton Siluanov បាននិយាយថា ការគាំទ្រសម្រាប់វិស័យបច្ចេកវិទ្យារបស់រុស្ស៊ីគឺជាអាទិភាពមួយ ។
សូមបញ្ជាក់ថា ចាប់តាំងពីប្រធានាធិបតីរុស្ស៊ីបានបញ្ជាឱ្យកងទ័ពរបស់លោក វាយលុកអ៊ុយក្រែនកាលពីខែកុម្ភៈឆ្នាំនេះមក ប្រទេសនេះបានរងនូវទណ្ឌកម្មមួយចំនួន ដែលបានដាក់គោលដៅទៅលើក្រុមអ្នកជំនួញ ស្ថាប័នហិរញ្ញវត្ថុ ក្រុមហ៊ុនរដ្ឋ និងឧស្សាហកម្មថាមពល៕SP
