បច្ចេកវិទ្យា៖ OpenAI ដែលជាក្រុមហ៊ុនបង្កើត chatbot ឈ្មោះថា ChatGPT បានបណ្តេញនាយកប្រតិបត្តិ និងជាស្ថាបនិករបស់ខ្លួនគឺលោក Sam Altman ចេញពីតំណែងកាលពីថ្ងៃសុក្រកន្លងទៅ ។ ការចាកចេញដ៏គួរឱ្យភ្ញាក់ផ្អើលរបស់គាត់បានធ្វើឱ្យមានការភ្ញាក់ផ្អើលក្នុងបណ្ដាឧស្សាហកម្ម AI ដែលកំពុងរីកចម្រើន។នេះបើតាមការចេញផ្សាយរបស់សារព័ត៌មានbusiness insider នៅថ្ងៃទី ១៨ ខែវិច្ឆិកា ឆ្នាំ២០២៣។ 

ក្រុមហ៊ុននៅក្នុងសេចក្តីថ្លែងការណ៍មួយបាននិយាយថាការស៊ើបអង្កេតផ្ទៃក្នុងបានរកឃើញថា លោក Altman តែងតែមិនមានភាពស្មោះត្រង់ជាមួយក្រុមប្រឹក្សាភិបាលរបស់ក្រុមហ៊ុននោះទេ។ ការចាកចេញរបស់លោក Altman ធ្វើឡើងបន្ទាប់ពីដំណើរការពិនិត្យដោយក្រុមប្រឹក្សា ដែលបានសន្និដ្ឋានថា គាត់មិនមានភាពស្មោះត្រង់ក្នុងការទំនាក់ទំនងរបស់គាត់ជាមួយក្រុមប្រឹក្សាភិបាល ដោយរារាំងសមត្ថភាពក្នុងការអនុវត្តទំនួលខុសត្រូវរបស់ខ្លួន”។ “ក្រុមប្រឹក្សាភិបាលលែងមានទំនុកចិត្តលើសមត្ថភាពរបស់លោក Sam Altman ក្នុងការបន្តដឹកនាំ OpenAI” ។

OpenAI បានប្រកាសថា លោកស្រី Mira Murati ដែលជាប្រធានផ្នែកបច្ចេកវិទ្យារបស់ក្រុមហ៊ុននឹងបម្រើការជានាយកប្រតិបត្តិបណ្តោះអាសន្នរហូតដល់អ្នកស្នងតំណែងថ្មីត្រូវបានជ្រើសរើស ។

សូមបញ្ជាក់ថា ដំណឹងនេះធ្វើឡើងបន្ទាប់ពីសន្និសីទអ្នកអភិវឌ្ឍន៍លើកដំបូងរបស់ OpenAI ដែលបានធ្វើឡើងនៅសាន់ហ្វ្រាន់ស៊ីស្កូកាលពីសប្តាហ៍មុន ដែលលោក Altman បានបម្រើការជាប្រធាននៃពិធី ដោយបង្ហាញស៊េរីនៃការធ្វើបច្ចុប្បន្នភាពឧបករណ៍បញ្ញាសិប្បនិម្មិតថ្មី រួមទាំងសមត្ថភាពសម្រាប់អ្នកអភិវឌ្ឍន៍ដើម្បីបង្កើតកំណែផ្ទាល់ខ្លួនរបស់ ChatGPT ៕