ឥណ្ឌា៖រថភ្លើងធ្លាក់ផ្លូវនៅភាគខាងកើតប្រទេសឥណ្ឌា ដែលបានសម្លាប់មនុស្សយ៉ាងហោចណាស់ ២៨៨ នាក់ និងរបួសជាង ៨០០ នាក់ គឺបណ្តាលមកពីកំហុសនៅក្នុងប្រព័ន្ធ ផ្តល់សញ្ញាអេឡិចត្រូនិ​ចដែ​លបញ្ជូនពួកគេទៅផ្លូវខុស។នេះបើតាមការចេញផ្សាយដោយសារព័ត៌មានAljazeera នៅថ្ងៃទី៥ ខែមិថុនា ឆ្នាំ២០២៣។

នៅតែមានការភាន់ច្រឡំអំពីមូលហេតុ ពិតប្រាកដនៃព្រឹត្តិការណ៍ដែលនាំទៅរក​គ្រោះម​ហន្តរាយផ្លូវដែ​កដ៏​អាក្រក់​បំផុតក្នុងរយៈពេលជាច្រើនទសវត្សរ៍នៅក្នុងស្រុក Balasore នៃរដ្ឋ Odisha កាលពីថ្ងៃសុ​ក្រកន្លងមកនេះ។​ទីភ្នាក់​ងារសា​រព័ត៌មានរ៉យទ័រ ដោយផ្អែកលើសាក្សីនៅកន្លែងកើតហេតុបានឱ្យដឹងថា សាកសពជាច្រើនកំ​ពុងស្ថិតនៅ​ក្នុងទូររថភ្លើងដែលបាក់ធ្លាក់ផ្លូវនោះ ហើយប្រតិបត្តិការជួយសង្គ្រោះកំពុងបន្ត ខណៈដែ​លចំនួ​នអ្នកស្លាប់ត្រូវបានគេរំពឹងថា នឹងកើនឡើងបន្ថែមទៀត។

លោក Anand បាន​បន្ថែម​ថា របាយការណ៍​បឋម​បង្ហាញ​ថា​ គ្រោះថ្នាក់​នេះ​គឺ​ជា​លទ្ធផល​នៃ​ឱ្យសញ្ញាមិនបានល្អ។ លោកមានប្រសាសន៍ថា រថភ្លើង Coromandel Express ត្រូវបានគេសន្មត់ថា នឹងធ្វើដំណើរលើខ្សែរថភ្លើងធំ ប៉ុន្តែមា​នសញ្ញាមួយត្រូវបានបញ្ចូនឱ្យរថភ្លើងនេះ ប្រើខ្សែង្វិលជុំជំនួសវិញ ដែលបណ្តាលឱ្យរថភ្លើងនេះ​ហួសទៅបុ​កនឹងរថភ្លើងដឹកទំនិញដែលបានចតនៅក្បែរនោះ។ បន្ទាប់មកទៀត ទូររបស់រថភ្លើងនោះក៏បានធ្លាក់ផ្លូវ ហើយ​បាន​បង្កឱ្យរថភ្លើងមួយខ្សែទៀតគឺ Howrah Superfast Express ក្រឡាប់ផងដែរ។

ជុំវិញបញ្ហានេះ នាយករដ្ឋមន្ត្រី ណារិនដ្រា ម៉ូឌី បានចុះទៅជួបជាមួយនឹងក្រុមសង្គ្រោះ​បន្ទាន់ដល់​កន្លែងកើ​តហេតុ​ ដោ​យធ្វើការត្រួតពិនិត្យលើរថភ្លើង និងបានជួបអ្នករស់រានមានជីវិតនៅមន្ទីរពេទ្យ ដោយប្តេជ្ញាផ្ត​ល់ជំនួយតាមដែលអាចធ្វើទៅបាន ដល់ជនដែលរងផលប៉ះពាល់នៅក្នុងហេតុការណ៍ដ៏សោកសៅនេះ។ រដ្ឋមន្ត្រីផ្លូវដែកឥណ្ឌា លោក អាសាវីនី វិសាណា បានឱ្យដឹងថា ក្រុមគ្រួសារនៃអ្នកស្លាប់បាត់​បង់់ជីវិតក្នុងសោកនា​ដកម្មនេះ​នឹងទទួលបានថវិកាជំនួយចំនួន ១២០០០ដុល្លារ ខណៈពេលដែលអ្នករបួសធ្ងន់ធ្ងរនឹងទទួលបាន ២សែនរូពី​ ចំណែ​កអ្នករងរបួសស្រាលនឹងទទួលបានប្រាក់ចំនួន ៥ម៉ឺនរូពី។ ទន្ទឹមគ្នានោះ រដ្ឋាភិបាលរដ្ឋ​មួយចំនួនក៏បានប្រកាសផ្តល់សំណងដល់ក្រុមគ្រួសារអ្នករងគ្រោះផងដែរ៕