ព្រុចសែល៖ រដ្ឋមន្ត្រីការពារជាតិអាមេរិក លោក ឡយដ៍ អូស្ទីន បានថ្លែងថា អ៊ុយក្រែនត្រូវបានរំពឹងថា នឹងតស៊ូប្រយុទ្ធក្នុងស្ថានភាពរដូវរងាដ៏អាក្រក់ ដើម្បីព្យាយាមដណ្តើមយកទឹកដីបន្ថែមទៀតពីកងកម្លាំងរុស្ស៊ីវិញ ខណៈដែលសម្ព័ន្ធមិត្តបានប្រកាសផ្តល់ប្រព័ន្ធការពារដែនអាកាសថ្មី និងផ្តល់ជំនួយបន្ថែមទៀត បន្ទាប់ពីការវាយប្រហារដោយមីស៊ីលរបស់រុស្ស៊ី។ នេះបើយោងតាមការចុះផ្សាយដោយទៅភ្នាក់ងារសារព័ត៌មាន Reuters នៅថ្ងៃទី១៣ តុលា ២០២២។

លោក អូស្ទីន បានថ្លែងនៅក្នុងពិធីជួបជុំមួយនៅឯទីស្នាក់ការអង្គការណាតូក្នុងទីក្រុងប្រ៊ុចសែលថា ប្រទេសប្រហែល ៥០ ដែលផ្តល់ជំនួយយោធាដល់អ៊ុយក្រែន រំពឹងថា ទីក្រុងកៀវនឹងធ្វើអ្វីដែលខ្លួនអាចធ្វើបាន ដើម្បីឆ្ពោះទៅមុខ បន្ទាប់ពីទទួលបានទឹកដីដែលកាន់កាប់ដោយកងកម្លាំងរុស្ស៊ីវិញក្នុងប៉ុន្មានសប្តាហ៍ថ្មីៗនេះ។ 

លោក អូស្ទីន បានប្រាប់សន្និសីទសារព័ត៌មានមួយបន្ទាប់ពីកិច្ចប្រជុំយ៉ាងដូច្នេះថា ខ្ញុំរំពឹងថា អ៊ុយក្រែននឹងបន្តធ្វើអ្វីៗគ្រប់យ៉ាងតាមដែលខ្លួនអាចធ្វើបានពេញមួយរដូវរងា ដើម្បីដណ្តើមយកទឹកដីរបស់ខ្លួនមកវិញ និងមានប្រសិទ្ធភាពនៅលើសមរភូមិ។ ហើយយើងនឹងធ្វើអ្វីគ្រប់យ៉ាងដែលយើងអាចធ្វើបាន ដើម្បីធ្វើឱ្យប្រាកដថា អ៊ុយក្រែនមានអ្វីដែលមានប្រសិទ្ធិភាព។

ជាមួយគ្នានេះ លោកឧត្តមសេនីយ៍ Mark Milley ប្រធានអគ្គសេនាធិការចម្រុះនៃកងទ័ពអាមេរិក បានប្រាប់អ្នកយកព័ត៌មានដែរថា រុស្ស៊ីបានវាយប្រហារហេដ្ឋារចនាសម្ព័ន្ធស៊ីវិលដោយចេតនា ក្នុងគោលបំណងធ្វើឱ្យប៉ះពាល់ដល់ជនស៊ីវិល។ លោកថា រុស្ស៊ីបានកំណត់គោលដៅលើមនុស្សចាស់ ស្ត្រី និងកុមារក្នុងប្រទេសអ៊ុយក្រែន។ 

គួរបញ្ជាក់ថា ការវាយប្រហារដោយអចេតនា និងចេតនាលើគោលដៅជនស៊ីវិល គឺជាឧក្រិដ្ឋកម្មសង្រ្គាមនៅក្នុងច្បាប់អន្តរជាតិនៃសង្គ្រាម។ ការវាយប្រហារតាមផ្លូវអាកាសចុងក្រោយបង្អស់របស់រុស្សី បានសម្លាប់មនុស្ស ១៩នាក់ និងរបួសជាង ១០០នាក់ ព្រមទាំងបានផ្តាច់ការផ្គត់ផ្គង់ថាមពលនៅទូទាំងប្រទេសអ៊ុយក្រែន៕