កាប៊ុល៖ អូស្ត្រាលី សហរដ្ឋអាមេរិក និងចក្រភពអង់គ្លេសបានចេញសេចក្តីជូនដំណឹងដល់ពលរដ្ឋរបស់ខ្លួន។ អ្នកដែលនៅខាងក្រៅអាកាសយានដ្ឋានរួចហើយត្រូវបានណែនាំឱ្យចាកចេញពីតំបន់នោះភ្លាមៗ។ នេះបើយោងតាមសេចក្ដីរាយការណ៍មុននេះបន្តិចដោយទីភ្នាក់ងារសារព័ត៌មាន BBC នៅថ្ងៃទី២៦ សីហា ២០២១៕

មនុស្សជាង ៨២.០០០ នាក់ត្រូវបានដឹកតាមយន្តហោះពីទីក្រុងកាប៊ុលក្នុងរយៈពេលត្រឹមតែ១០ថ្ងៃកន្លងទៅដែលជាពេលស្ថិតក្រោមកណ្តាប់ដៃក្រុមតាលីបង់។ បណ្តាប្រទេសនានាកំពុងប្រញាប់ប្រញាល់ជម្លៀសប្រជាជនឱ្យផុតកំណត់ត្រឹមថ្ងៃទី ៣១ ខែសីហា។ មនុស្សរាប់ពាន់នាក់នៅតែរង់ចាំទាំងក្នុងនិងក្រៅអាកាសយានដ្ឋានដោយសង្ឃឹមថានឹងហោះចេញពីប្រទេស។

បើយោងតាមរដ្ឋមន្ត្រីការបរទេសអាមេរិកលោក Antony Blinken តាលីបង់បានប្រឆាំងជំទាស់នឹងការពន្យារពេលផុតកំណត់ប៉ុន្តែថែមទាំងបានសន្យាថានឹងអនុញ្ញាតឱ្យជនបរទេសនិងជនជាតិអាហ្វហ្គានីស្ថានចាកចេញពីប្រទេសនេះលើសពីថ្ងៃទី ៣១ ខែសីហានេះ។

នៅថ្ងៃព្រហស្បតិ៍នេះ រដ្ឋមន្ត្រីការបរទេសអូស្រ្តាលីលោកម៉ារីស ផេន ( Marise Payne) បាននិយាយថា“ មានការគំរាមកំហែងជាបន្តបន្ទាប់និងខ្ពស់បំផុតនៃការវាយប្រហារភេរវកម្ម” ។ ការគំរាមកំហែងនេះ វាកើតឡើងប៉ុន្មានម៉ោងបន្ទាប់ពីក្រសួងការបរទេសអាមេរិកបានប្រាប់អ្នកដែលរង់ចាំនៅច្រក Abbey Gate, East Gate ឬ North Gate ឲ្យចាកចេញជាបន្ទាន់។

ដោយឡែក ចក្រភពអង់គ្លេសបានចេញដំបូន្មានស្រដៀងគ្នានេះដោយសុំឱ្យប្រជាជននៅទីនោះ“ផ្លាស់ទីលំនៅទៅកន្លែងមានសុវត្ថិភាពហើយរង់ចាំការណែនាំបន្ថែម” ។

លើសពីនេះទៅទៀត ការិយាល័យការបរទេសបាននិយាយថាស្ថានភាពសន្តិសុខនៅអាហ្វហ្គានីស្ថាននៅតែមានការប្រែប្រួលដោយបន្ថែមថាមានការគំរាមកំហែងជាបន្តបន្ទាប់និងខ្ពស់នៃការវាយប្រហារភេរវកម្ម។

គួរបញ្ជាក់ផងដែរថា នៅក្នុងសុន្ទរកថាមួយកាលពីថ្ងៃអង្គារប្រធានាធិបតីអាមេរិកលោក ចូ បៃដិន បាននិយាយថាយន្តហោះដែលគ្រប់គ្រងដោយសហរដ្ឋអាមេរិកនឹងត្រូវបញ្ចប់ក្នុងពេលឆាប់ៗនេះដោយសារតែការគំរាមកំហែងកាន់តែខ្លាំងឡើងពីក្រុមរដ្ឋអ៊ីស្លាមនៅអាហ្វហ្គានីស្ថាន។RT