បរទេស៖ Pfizer Inc (PFE.N) និង BioNTech SE បាននិយាយកាលពីថ្ងៃច័ន្ទថា វ៉ាក់សាំងការពារជំងឺកូវីដ ១៩ របស់ពួកគេ បង្កឱ្យមានភាពស៊ាំខ្លាំងចំពោះកុមារអាយុពី ៥ ទៅ ១១ ឆ្នាំ ហើយពួកគេមានគម្រោងស្នើសុំការអនុញ្ញាតឱ្យបានឆាប់តាមដែលអាចធ្វើទៅបាន ដើម្បីប្រើការចាក់ថ្នាំលើកុមារនៃក្រុមអាយុទាំងនោះ នៅសហរដ្ឋអាមេរិក អឺរ៉ុប និងកន្លែងផ្សេងទៀត។

ក្រុមហ៊ុនបាននិយាយថា វ៉ាក់សាំងចំនួន ២ដូស របស់ពួកគេ បានបង្កើតការឆ្លើយតបនៃប្រព័ន្ធភាពស៊ាំចំពោះក្មេងអាយុពី ៥ ទៅ ១១ ឆ្នាំ នៅក្នុងការសាកល្បងព្យាបាលដំណាក់កាលទី ២/ទី ៣ ដែលត្រូវនឹងអ្វីដែលបានសង្កេតឃើញពីមុនចំពោះក្មេងអាយុពី ១៦ ទៅ ២៥ ឆ្នាំ។ ពួកគេបានបន្ថែមថា ទម្រង់សុវត្ថិភាពជាទូទៅអាចប្រៀបធៀបទៅនឹងក្រុមមនុស្សចាស់ទៀតផង។

លោក Albert Bourla នាយកប្រតិបត្តិរបស់ក្រុមហ៊ុន Pfizer បាននិយាយនៅក្នុងសេចក្តីប្រកាសព័ត៌មានមួយថា លទ្ធផលនៃការសាកល្បងទាំងនេះផ្តល់នូវមូលដ្ឋានគ្រឹះដ៏រឹងមាំសម្រាប់ការស្វែងរកការអនុញ្ញាតនៃវ៉ាក់សាំងរបស់យើងសម្រាប់កុមារអាយុពី ៥ ទៅ ១១ ឆ្នាំ ហើយក្រុមហ៊ុនមានគម្រោងបញ្ជូនវាទៅឱ្យ FDA របស់សហរដ្ឋអាមេរិក និងនិយតករផ្សេងទៀតជាបន្ទាន់។

គួររំលឹកថា តាមរយៈប្រភពពីរបានប្រាប់នៅក្នុងខែនេះថា មន្រ្តីសុខាភិបាលកំពូលអាមេរិកជឿជាក់ថា និយតករអាចធ្វើការសម្រេចចិត្តថាតើការចាក់វ៉ាក់សាំងនេះមានសុវត្ថិភាពនិងមានប្រសិទ្ធភាពចំពោះក្មេងដែរឬអត់ ក្នុងរយៈពេល៣សប្តាហ៍ បន្ទាប់ពីក្រុមហ៊ុនទាំងនោះបានដាក់សំណើសុំការអនុញ្ញាត។ ការអនុញ្ញាតយ៉ាងឆាប់រហ័ស អាចជួយកាត់បន្ថយការកើនឡើងនៃសក្តានុពលនៃករណីក្នុងរដូវស្លឹកឈើជ្រុះនេះ ដោយសាលារៀនបានបើកដំណើរការនៅទូទាំងប្រទេស។ NR