ភ្នំពេញ៖ ក្នុងឱកាស ចុះពិនិត្យការដ្ឋានសាងសង  ស្ពានអាកាសថ្មើរជើង ចំណុចខាងលិចផ្សារដើមគរ នាព្រឹកថ្ងៃទី១៥ ខែមិថុនា ឆ្នាំ២០២០នេះ លោក ឃួង ស្រេង អភិបាលរាជធានីភ្នំពេញ បានឲ្យដឹងថា ទីក្រុងភ្នំពេញ នឹងមានការរៀបចំ ហេដ្ឋារចនាសម្ព័ន្ធ ស្ពានអាកាសថ្មើរជើង ២៥កន្លែងផ្សេងទៀត ក្នុងពេលខាងមុខ ខណៈដែលបច្ចុប្បន្ន មាន៣កន្លែងសាងសង់រួចរាល់ និងពីកន្លែងកំពុងសាងសង់ ។

សូមរំលឹកថា ស្ពានអាកាសថ្មើរជើង ចំណុចឈាងខាងលិចផ្សារដើមរគរ ប្រសព្វរវាងមហាវិថី ម៉ៅសេទុង និងផ្លូវលេខ ៣៣៦ ក្នុងខណ្ឌទួលគោក  មានបណ្ដោយប្រវែង ២៧ម៉ែត្រ និង ទទឹងប្រវែង ៣ម៉ែត្រ ត្រូវបាន សម្រុកសាងសង់ទាំងយប់ សម្រេចបាន ៩៥% គិតមកដល់បច្ចុប្បន្ននេះ ដែលបានរៀបចំពិធីក្រុងពាលី ទៅតាមទំនៀមទំលាប់ តាមបែបសាសនា បញ្ចុះបឋមសិលាសាងសង់ កាលពីថ្ងៃទី២៨ ខែធ្នូ ឆ្នាំ២០១៩កន្លងទៅ ។

គួរបញ្ជាក់ទៀតថា មកដល់ពេលនេះ រាជធានីភ្នំពេញ  មានស្ពានអាកាសថ្មើរជើង ចំនួន៣កន្លែងហើយ ក្នុងនោះរួមមាន នៅតំបន់ជម្ពូវ័ន្ត ខណ្ឌពោធិសែនជ័យ មានចំនួន២កន្លែង និងនៅតំបន់ភ្លើងស្តុបនាងគង្ហីង មានចំនួន១កន្លែង និងកំពុងស្ថាបនា  ស្ពានអាកាសថ្មើរជើង នៅតំបន់ផ្សារដើមគរ និងគម្រោងស្ថាបនា ស្ពានអាកាសថ្មើរជើង នៅត្រង់មុខសាលាបឋមសិក្សាសន្ធរម៉ុក  ដើម្បីឆ្លើយតប ទៅនឹងប្រទេសជាតិ មានការអភិវឌ្ឍ និងទីក្រុងមានភាព ស៊ីវិល័យ និងបង្កលក្ខណៈ ងាយស្រួល ដល់ប្រជាពលរដ្ឋឆ្លងកាត់ផ្លូវ ប្រកបដោយសុវត្ថិភាព៕ EB