ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃព្រហស្បតិ៍ បានចុះហត្ថលេខាលើបទបញ្ជាប្រតិបត្តិមួយ ដើម្បីហាមឃាត់ប្រតិបត្តិការរបស់ក្រុមហ៊ុនមេ TikTok ឈ្មោះ បៃដេនស៍ (ByteDance) និង ធិនសេន (Tencent) ជាម្ចាស់របស់ WeChat និងទុកពេល ៤៥ថ្ងៃ ដើម្បីលក់កម្មវិធីនេះ ទៅឲ្យក្រុមហ៊ុនអាមេរិក។ នេះបើយោងតាមការចុះផ្សាយរបស់សារព័ត៌មាន CGTN នៅថ្ងៃទី០៧ ខែសីហា ឆ្នាំ២០២០។

បទបញ្ជាប្រតិបត្តិ នេះបានកើតឡើង ខណៈដែលរដ្ឋបាល ត្រាំ បាននិយាយនៅសប្តាហ៍នេះថាខ្លួនកំពុងបង្កើនកិច្ចខិតខំប្រឹងប្រែងដើម្បីលុបបំបាត់កម្មវិធីចិន ដែលមិនគួរឱ្យទុកចិត្តពីបណ្តាញឌីជីថលសហរដ្ឋអាមេរិក និងបាននិយាយថា TikTok និង WeChat ជាការគំរាមកំហែងដល់សន្តិសុខជាតិ ដោយចោទប្រកាន់ថាកម្មវិធីទូរស័ព្ទដ៏ល្បីទាំងនេះបានចែករំលែកទិន្នន័យអ្នកប្រើប្រាស់ ជាមួយរដ្ឋាភិបាលចិន។

កាលពីសប្តាហ៍មុនចិនបានស្នើឱ្យសហរដ្ឋអាមេរិក បើកទីផ្សារដោយបើកចំហរ ដោយស្មើភាព មិនមានភាពរើសអើង បញ្ឈប់បញ្ហានយោបាយនិងសេដ្ឋកិច្ច ដោយថានេះជាការរំលោភលើគោលការណ៍របស់អង្គការពាណិជ្ជកម្មពិភពលោក។

ការហាមឃាត់ TikTok របស់សេតវិមាន បានធ្វើឱ្យមានការខឹងសម្បារក្នុងចំណោមអ្នកប្រើប្រាស់ចំនួន ៧០លាននាក់នៅអាមេរិក។ ទីភ្នាក់ងារស៊ីនហួ បានរាយការណ៍ថា hashtag #savetiktok2020 កំពុងតែកើនឡើង ហើយវីដេអូដែលមាន hashtag #ban មានចំនួនអ្នកចូលមើលច្រើនជាង ៦២០លាននាក់នៅយប់ថ្ងៃអាទិត្យនៅលើ TikTok៕SS