ក្រសួងការពារជាតិអាហ្វហ្គានីស្ថានបាននិយាយថា ក្រុមសកម្មប្រយុទ្ធតាលីបង់ ៧៤នាក់បានស្លាប់នៅក្នុងពេលប៉ះទង្គិចគ្នាមួយជាមួយកងកម្លាំងប្រដាប់អាវុធអាហ្វហ្គានីស្ថាននៅក្នុងខេត្ត Kandahar ។

ការប៉ះទង្គិចគ្នានេះបានកើតឡើងបន្ទាប់ពីកងទ័ពជាតិអាហ្វហ្គានីស្ថានបានធ្វើការវាយប្រហារទៅលើក្រុមសកម្មប្រយុទ្ធតាលីបង់ដែលកំពុងត្រៀមវាយប្រហារទីតាំងដែលកាន់កាប់ដោយកងកម្លាំងការពារជាតិ និងសន្តិសុខជាតិអាហ្វហ្គានីស្ថាន ហើយអាវុធមួយចំនួនធំក៏ត្រូវបានរឹបអូសយកផងដែរ។

ក្រសួងបន្តថា «ក្រុមសកម្មប្រយុទ្ធតាលីបង់ ៧៤នាក់ត្រូវបានសម្លាប់ និង ១៥នាក់ផ្សេងទៀតបានរងរបួសនៅក្នុងស្រុក Zheria ស្រុក Dand ស្រុក Panjwaw និងស្រុក Arghandab នៃខេត្ត Kandahar កាលពីថ្ងៃសៅរ៍។

យោងតាមទិន្នន័យដែលផ្តល់ឱ្យដោយក្រសួងការពារជាតិអាហ្វហ្គានីស្ថានបានឱ្យដឹងថា ក្រុមសកម្មប្រយុទ្ធតាលីបង់ ៨២នាក់ត្រូវបានសម្លាប់នៅក្នុងខេត្តនេះកាលពីដើមសប្តាហ៍នេះ ចំពេលដែលមានប្រតិបត្តិការយោធាប្រកបដោយនិរន្តរភាព។ប្រទេសអាហ្វហ្គានីស្ថាននៅតែបន្តរងនូវអំពើហឹង្សា និងការបំផ្ទុះគ្រាប់បែកជាច្រើន បើទោះបីជាមានកិច្ចចរចាសន្តិភាពដែលកំពុងបន្តរវាងរដ្ឋាភិបាល និងក្រុមតាលីបង់ ដែលបានចាប់ផ្តើមកាលពីខែកញ្ញាមុននេះនៅប្រទេសកាតាក៏ដោយ៕SP