ហុងកុង៖ ទីក្រុងហុងកុងនឹងហាមឃាត់ការប្រើប្រាស់បារីអេឡិចត្រូនិចនៅទីសាធារណៈនៅពាក់កណ្តាលឆ្នាំ២០២៦ ខណៈដែលរដ្ឋាភិបាលទីក្រុងនេះបានជំរុញឲ្យមានការប្រឆាំងនឹងការជក់បារី។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១០ខែកុម្ភៈនេះ។
មន្ត្រីកំពូលសុខាភិបាលរបស់ទីក្រុងហុងកុង លោក Lo Chung-mau បាននិយាយនៅក្នុងកម្មវិធីទូរទស្សន៍មួយថា៖ «ដើម្បីការពារយុវជនរបស់យើង យើងជឿថា វាដល់ពេលហើយដើម្បីហាមឃាត់ការប្រើប្រាស់បារីអេឡិចត្រូនិច»។លោក Lo បានបន្ថែមថា៖«យើងនឹងចាប់ផ្តើមដោយច្បាប់ប្រឆាំងនឹងការកាន់កាប់ និងការប្រើប្រាស់នៅទីធារណៈ ហើយនៅពេលដែលសាធារណៈជនទម្លាប់ទៅនឹងការហាមឃាត់យើងនឹងហាមឃាត់នៅគ្រប់ទីកន្លែង»។
មន្ត្រីកំពូលសុខាភិបាលរបស់ទីក្រុងហុងកុង រូបនេះបានបន្តទៀតថា គោលនយោបាយនេះបានផ្ដូចផ្ដើមឡើងជាលើកដំបូងកាលពីឆ្នាំមុន ជាការហាមប្រាមលើបារីអេឡិចត្រូនិច នឹងត្រូវបញ្ជូនទៅសភាក្នុងខែមេសា ជាមួយគោលដៅនៃការចូលជាធរមាននៅពាក់កណ្តាលឆ្នាំ២០២៦។
ជាផ្នែកមួយនៃការជំរុញផ្នែកនីតិបញ្ញត្តិរបស់ខ្លួន រដ្ឋាភិបាលហុងកុងក៏នឹងស្នើនៅក្នុងខែមេសាដើម្បីហាមឃាត់បារីដែលមិនមានរសជាតិ menthol។ការជក់បារីនៅតែជារឿងធម្មតានៅក្នុងទីក្រុងហុងកុង ទោះបីជាទីក្រុងនេះបានហាមឃាត់ការនាំចូល ផលិត និងលក់បារីអេឡិចត្រូនិច និងផលិតផលថ្នាំជក់ក្នុងខែមេសាឆ្នាំ២០២២ ក៏ដោយ។
មនុស្សជាច្រើនដែលនៅតែជក់បារីនៅក្នុងទីក្រុងហុងកុង ពឹងផ្អែកលើការនាំចូលខុសច្បាប់ ខណៈវាបានក្លាយទៅជាឧបករណ៍ប្រើប្រាស់ជាគ្រឿងញៀនកម្សាន្ត។ ទោះយ៉ាងណាអាជ្ញាធរហុងកុងសង្ឃឹមថាច្បាប់ថ្មីនឹងកាត់បន្ថយអត្រាការជក់បារីមកត្រឹម ៧,៨ ភាគរយនៅឆ្នាំនេះ ពោលគឺធ្លាក់ចុះពី ៩,១ ភាគរយនៅឆ្នាំ២០២៣។យោងតាមច្បាប់ឆ្នាំ ២០២២ អ្នកដែលនាំចូលបារីអេឡិចត្រូនិចអាចត្រូវផ្តន្ទាទោសដាក់ពន្ធនាគាររហូតដល់៧ឆ្នាំ និងពិន័យជាប្រាក់ចំនួន២លានដុល្លារហុងកុង (២៥៧,០០០ដុល្លារអាមេរិក) ខណៈដែលអ្នកលក់ និងអ្នកផលិតអាចជាប់គុករហូតដល់៦ខែ។
គួរបញ្ជាក់ថាបារីអេឡិចត្រូនិចប៉ុន្មានឆ្នាំចុងក្រោយនេះបានក្លាយជាបារីដែលពេញនិយមជាពិសេសក្នុងចំណោមយុវវ័យ។ដើម្បីទប់ស្គាល់នឹងផលប៉ះពាល់ពីបារីសម័យទំនើបនេះ កាលពីឆ្នាំមុនមានប្រទេសប្រហែល ៣៥ហាមឃាត់ការលក់បារីអេឡិចត្រូនិច នេះបើយោងតាមអង្គការសុខភាពពិភពលោក(WHO)៕
