ក្រុមសកម្មប្រយុទ្ធប៉ាឡេស្ទីនធ្វើការបាញ់រ៉ុក្កែត នាំអោយអ៊ីស្រាអែលវាយប្រហារនៅតំបន់ហ្គាហ្សា
ប៉ាឡេស្ទីន៖ ក្រុមសកម្មប្រយុទ្ធប៉ាឡេស្ទីន កាលពីថ្ងៃសុក្រ បានបាញ់រ៉ុក្កែតចំនួនពីរគ្រាប់ ពីតំបន់ហ្គាហ្សាស្ទ្រីប ឆ្ពោះទៅភាគខាងត្បូងនៃប្រទេសអ៊ីស្រាអែល ប៉ុន្តែត្រូវបានស្ទាក់ចាប់បានដោយប្រព័ន្ធការពារកាំជ្រួចរបស់អ៊ីស្រាអែល ហើយបន្ទាប់មក អ៊ីស្រាអែលបានធ្វើការវាយប្រហារនៅតំបន់ហ្គាហ្សាវិញ។
ហេតុការណ៍បាញ់បោះកើតឡើងនៅតំបន់ព្រំដែន បានកើតឡើងបន្ទាប់ពីការវាយឆ្មក់របស់អ៊ីស្រាអែលនៅតំបន់វ៉េសប៊ែង ដែលត្រូវបានគេកាន់កាប់ កាលពីថ្ងៃព្រហស្បតិ៍ ដែលនាំឱ្យមានចំនួនអ្នកស្លាប់ច្រើនបំផុតក្នុងប៉ុន្មានឆ្នាំនៃការប្រយុទ្ធគ្នា។
គ្រាប់រ៉ុក្កែតពេញមួយយប់បានបង្កសំឡេងស៊ីរ៉ែននៅក្នុងសហគមន៍អ៊ីស្រាអែល នៅជិតព្រំដែនជាមួយតំបន់ហ្គាហ្សា ដោយបណ្តាលអោយអ្នកស្រុករកកន្លែងសុវត្ថិភាពជ្រកកោន។ យ៉ាងណាម៉ិញ មិនមានរបាយការណ៍ពីអ្នករបួសនោះទេ។
ជាងនេះទៀតសោដ ទូរទស្សន៍ប៉ុស្តិ៍លេខ ១២ របស់អ៊ីស្រាអែល បានចាក់ផ្សាយវីដេអូអំពីកាំជ្រួចស្ទាក់ចាប់របស់អ៊ីស្រាអែលដែលកំពុងត្រូវបានបាញ់ទៅលើមេឃពេលយប់នៅពីលើទីក្រុង Ashkelon ប្រហែល ១២ គីឡូម៉ែត្រភាគខាងជើងនៃហ្គាហ្សា ដែលត្រូវបានគ្រប់គ្រងដោយក្រុមសកម្មប្រយុទ្ធអ៊ីស្លាម ហាម៉ាស ។ ប៉ុន្មានម៉ោងក្រោយមក យោធាអ៊ីស្រាអែលបាននិយាយថា ខ្លួនបានធ្វើការវាយប្រហារនៅតំបន់ហ្គាហ្សា។ ជាមួយគ្នានេះដែរ សាក្សីរបស់ប៉ាឡេស្ទីនក៏បាននិយាយថា យន្តហោះអ៊ីស្រាអែលបានកំណត់គោលដៅលើជំរុំហ្វឹកហ្វឺនរបស់ក្រុមហាម៉ាស។ គ្មានការរងរបួសត្រូវបានគេរាយការណ៍ដូចគ្នាដែរ។
គួររំលឹកថា អំពើហិង្សាបានកើនឡើងចាប់តាំងពីមានការវាយប្រហារតាមដងផ្លូវដ៏សាហាវរបស់ប៉ាឡេស្ទីនក្នុងប្រទេសអ៊ីស្រាអែលកាលពីខែមីនា និងខែមេសា។ ភាពជាប់គាំងផ្នែកការទូតបានរួមចំណែកជួយប្រមូលផ្តុំការគាំទ្រប៉ាឡេស្ទីនសម្រាប់ក្រុមហាម៉ាស និងក្រុមជីហាតអ៊ីស្លាម ដែលបដិសេធការរួមរស់ជាមួយអ៊ីស្រាអែល ដែលជាកន្លែងរដ្ឋាភិបាលស្នូលនិយមស្តាំថ្មីរបស់ Netanyahu រួមមានសមាជិកដែលប្រឆាំងនឹងរដ្ឋប៉ាឡេស្ទីន៕ NR
