ចាហ្វាយខេត្តរបស់វៀតណាមម្នាក់ ត្រូវបានសមត្ថកិច្ចចាប់ខ្លួនពាក់ព័ន្ធនឹងការបូមខ្សាច់ខុសច្បាប់ដែលបង្កឱ្យខូចប្រយោជន៍ជាតិ
វៀតណាម៖ ចាហ្វាយខេត្ត An Giang លោក ង្វៀន ថាញ់ប៊ិញ នៅតំបន់ដីសណ្ដទន្លេមេគង្គត្រូវបានចាប់ខ្លួនពីបទប្រើប្រាស់អំណាចរបស់ខ្លួន ដើម្បីជួយក្រុមហ៊ុនម៉ៅការផ្លូវល្បឿនលឿនពីខាងជើងទៅត្បូង ដើម្បីប្រព្រឹត្តរឿងអាស្រូវការបូមខ្សាច់ដ៏ធំបំផុតនៅក្នុងប្រទេស។នេះបើតាមការចេញផ្សាយដោយសារព័ត៌មានVNexpressនៅថ្ងៃទី ២៦ ខែធ្នូ ឆ្នាំ២០២៣។
លោក ង្វៀន ថាញ់ប៊ិញ ត្រូវបានក្រសួងសន្តិសុខសាធារណៈឃុំខ្លួនកាលពីថ្ងៃចន្ទទី២៥ ខែធ្នូ ដោយកាត់ទោសពីបទបំពានអំណាច និងបានប្រើប្រាស់អំណាចរបស់ខ្លួន ដើម្បីផ្តល់អាជ្ញាបណ្ណដល់ក្រុមហ៊ុន Trung Hau 68 JSC ដើម្បីរុករក កេងប្រវ័ញ្ច និងកែតម្រូវសមត្ថភាពដោយខុសច្បាប់ នៅអណ្តូងខ្សាច់ក្នុងឃុំ My Hiep និង Binh Phuoc Xuan ក្នុងស្រុក Cho Moi នៃខេត្តមាត់ជ្រូក(កម្ពុជាក្រោម)។
ក្នុងសេចក្តីថ្លែងការណ៍បានកត់សម្គាល់ថា៖«លោក ប៊ិញ បានបំពានអំណាចរបស់ខ្លួន ធ្វើអន្តរាគមន៍ និងចេញបទបញ្ជាដើម្បីឱ្យក្រុមហ៊ុន Trung Hau ៦៨ អាចកេងយកខ្សាច់លើសបរិមាណកំណត់នៅក្នុងខេត្តមាត់ជ្រូក ដោយទទួលបានទឹកប្រាក់យ៉ាងច្រើនសន្ធឹកសន្ធាប់»។
សូមបញ្ជាក់ថា ក្រុមហ៊ុន Trung Hau 68 បានបូមយកខ្សាច់ជាង ៤,៧លានម៉ែត្រគូប ដែលមានតម្លៃ២៥៣លានដុងនៅលើទីផ្សារ ខណៈអាជ្ញាបណ្ណដើម្បីទាញយកមានត្រឹមតែ ១,៥លានម៉ែត្រគូបប៉ុណ្ណោះ៕
