បរទេស៖ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) កាលពីថ្ងៃអាទិត្យ (១៤ មករា) បាននិយាយថាចំនួនមនុស្សភៀសខ្លួនពីសង្គ្រាមនៅក្នុងប្រទេសស៊ូដង់ បានកើនឡើងលើសពី ៧,៤លាននាក់។នេះបើតាមការចេញផ្សាយដោយសារព័ត៌មានBBCនៅថ្ងៃទី ១៥ ខែមករា ឆ្នាំ២០២៤។
ការិយាល័យកិច្ចការមនុស្សធម៌ OCHA បាននិយាយនៅក្នុងការធ្វើបច្ចុប្បន្នភាពចុងក្រោយរបស់ខ្លួនកាលពីថ្ងៃអាទិត្យថា «មនុស្សជាង ៧,៤លាននាក់ ត្រូវបានផ្លាស់ទីលំនៅទាំងក្នុង និងក្រៅប្រទេសស៊ូដង់ ចាប់តាំងពីការប្រយុទ្ធគ្នាបានផ្ទុះឡើងរវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្ររហ័សយោធាប៉ារ៉ា (RSF) នៅថ្ងៃទី១៥ ខែមេសា ឆ្នាំ២០២៣ មក»។
ការយាល័យនេះបានបញ្ជាក់ថាចំនួនមនុស្សផ្លាស់ទីលំនៅនៅក្នុងប្រទេសស៊ូដង់ បានកើនឡើងប្រហែល ៦១១.០០០នាក់ ក្នុងរយៈពេលមួយខែកន្លងមកនេះ ជាមួយនឹងការផ្លាស់ទីលំនៅថ្មីជាច្រើនពីរដ្ឋ ហ្កេហ្ស៊ីរ៉ា (Gezira) និងរដ្ឋដទៃទៀត៕
