ភ្នំពេញ ៖ នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ បានណែនាំដល់កងកម្លាំងនគរបាលទូទាំងប្រទេស ត្រូវបង្កើនការយកចិត្តទុកដាក់ជួយសម្រួលចរាចរណ៍ជូនប្រជាពលរដ្ឋ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ហើយត្រូវប្រើប្រាស់ពាក្យសម្ដី និងកាយវិការឱ្យបានសមរម្យ សាកសមជាមន្ដ្រីនគរបាលដែលបម្រើប្រជាពលរដ្ឋដោយភាពកក់ក្ដៅ។

តាមរយៈសារសំឡេង នាថ្ងៃទី១១ កញ្ញា នាយឧត្តមសេនីយ៍ សន្ដិបណ្ឌិត នេត សាវឿន បានគូសបញ្ជាក់ថា គោលការណ៍សំខាន់ក្នុងឱកាសពិធីកាន់បិណ្ឌ និងភ្ជុំបិណ្ឌនេះ គឺសម្រួលចរាចរណ៍ ការពារសន្ដិសុខសណ្ដាប់ធ្នាប់ ជូនប្រជាពលរដ្ឋដែលជាអ្នកធ្វើដំណើរតាមផ្លូវដែលកំពុងមមាញឹកទាំងអស់។

ក្នុងន័យនេះ នាយឧត្តមសេនីយ៍ អគ្គស្នងការនគរបាលជាតិ ជំរុញឱ្យនគរបាលនៅតាមគោលដៅទាំងអស់ ពិសេសគោលដៅអនុវត្តច្បាប់ចរាចរណ៍ ត្រូវបង្កើនការយកចិត្តទុកដាក់សម្រួលចរាចរណ៍ជូនប្រជាពលរដ្ឋ និងអប់រំច្បាប់ចរាចរណ៍។ បន្ថែមពីនេះ ត្រូវប្រើប្រាស់កាយវិការ និងពាក្យសម្ដីឲ្យបានសមរម្យទៅកាន់ប្រជាពលរដ្ឋ។

នាយឧត្តមសេនីយ៍ សន្ដិបណ្ឌិត នេត សាវឿន បានថ្លែងយ៉ាងដូច្នេះថា «នាយកដ្ឋានជំនាញ អង្គភាពក្រោមឱវាទអគ្គស្នងការដ្ឋាននគរបាលជាតិ ស្នងការរាជធានី-ខេត្ត ពេលរដូវភ្ជុំបិណ្ឌមកដល់ប្រជាពលរដ្ឋទាំងអស់ប្រមូលផ្ដុំធ្វើដំណើរតាមដងផ្លូវ ដើម្បីទៅស្រុកកំណើត និងដើម្បីទៅវត្ត។ ដូច្នេះសូមកងកម្លាំងទាំងអស់បង្កើនកិច្ចប្រតិបត្តិការឲ្យល្អ ដើម្បីបម្រើប្រជាពលរដ្ឋក្នុងរដូវភ្ជុំបិណ្ឌនេះ។ សូមកែប្រែឥរិយាបថ ពាក្យសម្ដី អាកប្បកិរិយាឲ្យបានសមរម្យត្រឹមត្រូវ គោលការណ៍សំខាន់របស់យើង គឺសម្រួលចរាចរណ៍ សម្រួលសន្ដិសុខសណ្ដាប់ធ្នាប់ ជូនអ្នកធ្វើដំណើរទាំងអស់តាមដងផ្លូវ ឬតាមគោលដៅនានា»៕EB