ប្រធានាធិបតីអាម៉េរិក លោក ចូ បៃឌិន ថាមីស៊ីលដែលបាញ់លើប៉ូឡូញមិនត្រូវបានបាញ់ចេញពីទឹកដីរុស្ស៊ីទេ
ឥណ្ឌូនេស៊ី៖ប្រធានាធិបតីអាម៉េរិកលោក បៃឌិន បានលើកឡើងថា មីស៊ីលដែលបានធ្លាក់ក្នុងប្រទេសប៉ូឡូញ និងបានសម្លាប់មនុស្សពីរនាក់ ទំនងជាមិនត្រូវបានបាញ់ចេញពីប្រទេសរុស្ស៊ី ដោយសារតែគន្លងរបស់វា។ ប្រធានាធិបតីអាម៉េរិក បាននិយាយនៅក្នុងកិច្ចប្រជុំ G20 នៅកោះបាលី ប្រទេសឥណ្ឌូណេស៊ី បន្ទាប់ពីបានកោះប្រជុំបន្ទាន់មួយជាមួយមេដឹកនាំលោកខាងលិច ដើម្បីពិភាក្សាអំពីការផ្ទុះនៅលើទឹកដីនៃសមាជិកអង្គការណាតូ។
នៅពេលសួរថាតើមីស៊ីលទាំងនោះត្រូវបានបាញ់ចេញពីទឹកដីរុស្ស៊ីឬអត់ លោក បៃឌិន បានឆ្លើយថា៖«មានព័ត៌មានបឋមដែលបង្ហាញថា ពួកវាមិនមែនហោះចេញពីរុស្ស៊ីទេ។ ខ្ញុំមិនចង់និយាយនោះទេ ទាល់តែយើងស៊ើបអង្កេតទាំងស្រុង»។ ក្រសួងការបរទេសប៉ូឡូញបានពណ៌នាមីស៊ីលនោះថាជាមីស៊ីលផលិតដោយរុស្ស៊ី ប៉ុន្តែវាក៏អាចជាមីស៊ីល S-300 របស់អ៊ុយក្រែនផងដែរ។
លោក បៃឌិន បានលើកឡើងថា៖«យើងបានយល់ព្រមគាំទ្រការស៊ើបអង្កេតរបស់ប្រទេសប៉ូឡូញលើការផ្ទុះនៅតំបន់ជនបទ ជិតព្រំដែនអ៊ុយក្រែន ហើយពួកគេនឹងធ្វើឱ្យប្រាកដថាយើងដឹងពីអ្វីដែលបានកើតឡើងពិតប្រាកដ»។
ក្រោយមក រដ្ឋមន្ត្រីការបរទេសអ៊ុយក្រែនរូបនេះ បានបញ្ជាក់ថា លោកបានហៅទូរសព្ទលម្អិតជាមួយរដ្ឋមន្ត្រីការបរទេសអាម៉េរិក លោក Antony Blinken ស្តីពីភេរវកម្មមីស៊ីលរុស្ស៊ី ទំហំនៃគោលបំណង និងផលវិបាករបស់វា។ លោក Kuleba បានលើកឡើងថា៖«ខ្ញុំបានសង្កត់ធ្ងន់លើការឆ្លើយតបចំពោះអ្វីដែលបានកើតឡើងក្នុងប្រទេសប៉ូឡូញត្រូវតែរឹងមាំ និងមានគោលការណ៍»៕SP
