នេប៉ាល់ ៖ ភ្លៀងធ្លាក់ខ្លាំងបានវាយប្រហារភូមិយ៉ាងហោចណាស់ចំនួនពីរនៅតំបន់ភ្នំភាគខាងកើតនៃប្រទេសនេប៉ាល់កាលពីថ្ងៃអាទិត្យ ក្នុងនោះការរអិលបាក់ដី  បានសម្លាប់មនុស្សយ៉ាងហោចណាស់ ១១នាក់ និងបន្សល់ទុកមនុស្សម្នាក់ទៀតកំពុងបាត់ខ្លួន។

លោក  Bholanath Guragai  មន្ត្រីរដ្ឋបាលស្រុកអ៊ីលលែម បាននិយាយថា មនុស្សចំនួន ០៦នាក់នៅក្នុងគ្រួសារតែមួយត្រូវស្លាប់នៅពេលដែលការរអិលបាក់ដីបានធ្វើឱ្យផ្ទះរបស់ពួកគេបាក់ ខណៈដែលពួកគេកំពុងគេងលក់កាលពីព្រឹកថ្ងៃអាទិត្យ ហើយមនុស្ស ០៥នាក់ទៀតនៅក្នុងភូមិជិតខាងត្រូវបានស្លាប់ដែរនៅក្នុងហេតុការណ៍រអិលបាក់ដីដាច់ដោយឡែកពីគ្នាមួយផ្សេងទៀត។

ជំនន់ទឹកភ្លៀងបានបង្អាក់កិច្ចខិតខំប្រឹងប្រែងដើម្បីចូលទៅដល់ភូមិទាំងនោះ ហើយផ្លូវជាច្រើនត្រូវបានទឹកហូរកាត់ ឬស្ទះដោយការរអិលបាក់ដី។ លោក ហ្គូរ៉ាកៃ បាននិយាយថា យើងត្រូវការឧទ្ធម្ភាគចក្រមួយចំនួនពីរដ្ឋាភិបាលកណ្តាល ដើម្បីជួយដល់ប្រជាជនដែលត្រូវការការជម្លៀសផ្នែកវេជ្ជសាស្រ្ត។

រដ្ឋាភិបាលនេប៉ាល់បានចេញការព្រមានអំពីភ្លៀងធ្លាក់ខ្លាំងនៅតំបន់ភាគខាងកើត និងភាគកណ្តាលនៃប្រទេសចាប់ពីថ្ងៃសៅរ៍សប្តាហ៍មុនដល់ថ្ងៃច័ន្ទម្សិលមិញនេះ ខណៈដែលមានការបិទផ្លូវហាយវេធំៗមួយចំនួន។ជើងហោះហើរក្នុងស្រុកទាំងអស់ត្រូវបានផ្អាកកាលពីថ្ងៃសៅរ៍ដោយអាជ្ញាធរអាកាសចរណ៍ ដោយសារតែភ្លៀងធ្លាក់ខ្លាំង និងការមើលឃើញមិនល្អ ប៉ុន្តែត្រូវបានបើកឡើងវិញនៅថ្ងៃអាទិត្យ៕