ឥណ្ឌា៖ អង្គការសហប្រជាជាតិបានចេញផ្សាយទិន្នន័យកាលពីថ្ងៃពុធដោយបានបង្ហាញថា ឥណ្ឌានឹងក្លាយជាប្រទេសដែលមានប្រជាជនច្រើនជាងគេលើពិភពលោក ក្នុងនោះ ឥណ្ឌានឹងវ៉ាដាច់ប្រទេសចិនក្នុងចំនួនប្រជាជនជិត ៣ លាននាក់បន្ថែមទៀតនៅពាក់កណ្តាលឆ្នាំនេះ។
នៅក្នុងរបាយការណ៍ស្តីពីស្ថានភាពប្រជាជនពិភពលោករបស់អង្គការសហប្រជាជាតិ (UNFPA) នៅឆ្នាំនេះ បានប៉ាន់ប្រមាណថា ប្រជាជនឥណ្ឌាមានចំនួន ១.៤២៨៦ ពាន់លាននាក់ ធៀបនឹងប្រជាជនចិន ១.៤២៥៧ ពាន់លាននាក់ ។ អ្នកជំនាញស្រាវជ្រាវចំនួនប្រជាជនដោយប្រើប្រាស់ទិន្នន័យពីមុន របស់អង្គការសហប្រជាជាតិ បានព្យាករណ៍ថាឥណ្ឌានឹងវ៉ាដាច់ប្រទេសចិននៅក្នុងខែនេះ ប៉ុន្តែរបាយការណ៍ចុងក្រោយបំផុតរបស់ស្ថាប័នពិភពលោកមិនបានបញ្ជាក់កាលបរិច្ឆេទច្បាស់លាស់នោះទេ។
លោកសាកថាកអារ៉ូរ៉ា អ្នករស់នៅក្នុងទីក្រុងញូវដេលី ប្រតិកម្មទៅនឹងការប៉ាន់ស្មាននេះ ដោយបាននិយាយថា "ចំនួនប្រជាជនលើស ឬចំនួនមនុស្សច្រើនលើសកំណត់ដូចទៅតាមការប្រមាណនេះ គឺជាការប្រមាថ និងបង្ខូចកេរ្តិ៍ឈ្មោះសម្រាប់ឥណ្ឌា ព្រោះថាធនធានធម្មជាតិកំពុងធ្លាក់ចុះ បែជាចំនួនប្រជាជនកើនឡើងទៅវិញ" ។ មន្ត្រីអង្គការសហប្រជាជាតិបាននិយាយថា មិនអាចបញ្ជាក់កាលបរិច្ឆេទបានទេ ដោយសារតែទិន្នន័យពីឥណ្ឌា និងចិន មិនមានភាពប្រាកដប្រជា ព្រោះស្ថិតិជំរឿនចុងក្រោយរបស់ប្រទេសឥណ្ឌា បានធ្វើឡើងក្នុងឆ្នាំ ២០១១ និងបន្ទាប់មកនៅឆ្នាំ ២០២១ ត្រូវបានពន្យារពេលដោយសារតែជំងឺរាតត្បាតកូវីដ១៩ ។
ទោះជាយ៉ាងណាក៏ដោយ ទិន្នន័យរបស់រដ្ឋាភិបាលឥណ្ឌាបានបង្ហាញថា កំណើនប្រជាជនឥណ្ឌាប្រចាំឆ្នាំ មានកំណើនជាមធ្យម ១.២% ចាប់តាំងពីឆ្នាំ ២០១១ ដោយកំណើននេះបានធ្លាក់ចុះពី ១.៧% កាលពីទសវត្សរ៍មុន។
បន្ថែមបីនេះ ការស្ទាបស្ទង់មតិសាធារណៈដោយរបាយការណ៍ស្តីពីស្ថានភាពប្រជាជនពិភពលោករបស់អង្គការសហប្រជាជាតិ (UNFPA) សម្រាប់របាយការណ៍ឆ្នាំ ២០២៣ បានរកឃើញថា ក្រៅពីឥណ្ឌា រួមមានប្រទេសប្រេស៊ីល អេហ្ស៊ីប និងនីហ្សេរីយ៉ា ដោយចំនួនប្រជាជននៅក្នុងប្រទេសនីមួយៗ "មានចំនួនច្រើនពេក ហើយអត្រាមានកូនគឺខ្ពស់ពេកផងដែរ" ៕
