ម៉ាបាដ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី០៦ ខែធ្នូ ឆ្នាំ២០២១ថា សេចក្តីថ្លែងការណ៍របស់កងទ័ពប៉ាគីស្ថាន បានឲ្យដឹងនៅថ្ងៃចន្ទនេះថា មន្ត្រីយោធាប៉ាគីស្ថាន ចំនួន២នាក់បានស្លាប់ បាត់បង់ជីវិតនៅគ្រាដែលឧទ្ធម្ភាគចក្រយោធា១គ្រឿងបានធ្លាក់នៅក្នុងតំបន់ជម្លោះ កាស្មៀរ ។
ឧទ្ធម្ភាគចក្រដែលជាកម្មសិទ្ធិរបស់កងទ័ពប៉ាគីស្ថាន បានធ្លាក់នៅឯផ្ទាំងទឹកកកមួយដែលធ្វើឱ្យអ្នកបើកយន្តហោះទាំង២នាក់បានស្លាប់ នេះបើតាមសារព័ត៌មាន Inter-Services Public Relations របស់កងទ័ពបានឲ្យដឹងដូច្នេះតាមរយៈសេចក្តីថ្លែងការណ៍មួយ ។
មូលហេតុនៃការធ្លាក់នេះមិនត្រូវបានបង្ហាញឱ្យដឹងនៅក្នុងសេចក្តីថ្លែងការណ៍នេះនៅឡើយទេ តំបន់នេះគឺជាកន្លែងសម្រាប់សមរភូមិប្រយុទ្ធខ្ពស់បំផុតមួយក្នុងពិភពលោក ដោយប៉ាគីស្ថាន និងឥណ្ឌាបានដាក់ពង្រាយកងទ័ពចាប់តាំងពីទសវត្សរ៍ឆ្នាំ ១៩៨០ ។
សូមបញ្ជាក់ថា នៅក្នុងឧប្បត្តិហេតុស្រដៀងគ្នានេះកាលពីចុងខែធ្នូឆ្នាំមុន ឧទ្ធម្ភាគចក្រអាកាសចរណ៍កងទ័ពប៉ាគីស្ថានបានធ្លាក់ដោយសារតែបញ្ហាបច្ចេកទេស នៅពេលនោះ ទាហានបួននាក់ត្រូវបានស្លាប់ក្នុងឧបទ្ទវហេតុនោះ៕SP
