ឥណ្ឌា ៖ មនុស្សយ៉ាងហោចណាស់១៣នាក់បានស្លាប់ បន្ទាប់ពីទូកល្បឿនលឿនមួយគ្រឿង របស់កងទ័ពជើងទឹកឥណ្ឌាបាត់បង់ការគ្រប់គ្រង អំឡុងពេលធ្វើតេស្តម៉ាស៊ីន ហើយបានទៅបុកស្រឡាដឹកអ្នកដំណើរមួយគ្រឿង នៅឆ្នេរសមុទ្រនៃទីក្រុងMumbaiនៅថ្ងៃពុធ បណ្តាលឱ្យលិច។ នេះបើតាមការបញ្ជាក់ពីអ្នកនាំពាក្យកងទ័ពជើងទឹក។

 ក្នុងចំណោមអ្នកស្លាប់ ក៏មានកងទ័ពជើងទឹកឥណ្ឌាចំនួន៣នាក់ផងដែរ ខណៈមនុស្សជាង១០០នាក់ត្រូវបានជួយសង្រ្គោះ។

ស្រឡាងដែលជាកម្មសិទ្ធិរបស់ក្រុមហ៊ុនឯកជន កំពុងតែធ្វើដំណើរទៅកាន់រូងភ្នំ Elephanta ដែលជាគោលដៅទេសចរណ៍ដ៏ពេញនិយម នៅពេលដែលវាត្រូវបានបុកដោយទូកល្បឿនលឿនមួយគ្រឿងនោះ។ 

សាក្សីនៅលើស្រឡាងនិយាយថា ទូករបស់កងទ័ពជើងទឹកឥណ្ឌា បានបុកស្រឡាងដែលខ្លួនកំពុងជិះយ៉ាងពេញទំហឹង ហើយទឹកបានចាប់ផ្តើមហូរចូលស្រឡាង ភ្លាមៗអ្នកបញ្ជាស្រឡាងបានណែនាំឱ្យអ្នកដំណើរប្រញាប់ពាក់អាវពោងសុវត្ថិភាព ហើយបន្ទាប់មកស្រឡាងក៏បានលិច។ អ្នកដំណើរខ្លះបានហែលទឹក ១០ទៅ១៥នាទី មុនទូកសង្រ្គោះបានមកដល់។ បើតាមកងទ័ពជើងទឹកឥណ្ឌានិយាយថា ទូកល្បឿនលឿនមួយគ្រឿងនេះ មានបញ្ហាម៉ាស៊ីន៕