ស៊ុយអែត៖ ខ្សែប្រយុទ្ធ Zlatan Ibrahimovic ត្រូវបានកោះហៅចូលក្រុមជម្រើសជាតិស៊ុយអែតសាជាថ្មី ក្នុងវ័យ៣៩ឆ្នាំ។ 

កីឡាករក្លិប AC Milan រូបនេះ បានស្វាគមន៍សម្រាប់ការកោះហៅចូលជម្រើសជាតិជាថ្មីនេះ តាំងពីខែវិច្ឆិកា ឆ្នាំមុន ហើយគ្រូបង្វឹកក្រុមជម្រើសជាតិស៊ុយអែត បានធ្វើដំណើរទៅជួបរូបគេផ្ទាល់ដល់ទីក្រុង Milan ប្រទេសអ៊ីតាលីផងដែរ។

យ៉ាងណាមិញ Zlatan Ibrahimovic បានលេងនៅជម្រើសជាតិស៊ុយអែតតាំងពីឆ្នាំ២០០១ ហើយបានចូលនិវត្តន៍ កាលពីឆ្នាំ ២០១៦។ រូបគេរកបាន៦២គ្រាប់ ពីការបង្ហាញខ្លួន ១១៦ដង ដែលមានន័យថា គេជាអ្នកទាត់ចូលច្រើនជាងគេនៅក្នុងក្រុមជម្រើសជាតិស៊ុយអែត។

គួរបញ្ជាក់ផងដែរថា Zlatan Ibrahimovic អាចនឹងបង្ហាញខ្លួនជាថ្មីពេលស៊ុយអែតត្រូវប៉ះហ្សកហ្ស៊ី នៅថ្ងៃទី២៥ ខែមីនា និងប៉ះកូសូវ៉ូ នៅ៣ថ្ងៃបន្ទាប់ ក្នុងវគ្គជម្រុះ FIFA World Cup 2022៕