ក្រុងគៀវ៖ ក្បួនរថយន្តយោធារុស្ស៊ីដ៏ច្រើនបាននឹងកំពុងប្រមូលផ្តុំនៅជាយក្រុងនៃរដ្ឋធានីអ៊ុយក្រែននៅថ្ងៃអង្គារទី ០១ ខែមីនា ខណៈដែលការភ័យខ្លាចកាន់តែខ្លាំងឡើង កងកម្លាំងឈ្លានពានត្រូវបានកំណត់ដើម្បីបើកការវាយប្រហារដ៏បំផ្លិចបំផ្លាញក្នុងគោលបំណងដណ្តើមកាន់កាប់ទីក្រុងគៀវ និងទីក្រុងសំខាន់ៗផ្សេងទៀត។ នេះបើយោងតាមការចេញផ្សាយដោយទីភ្នាក់ងារសារព័ត៌មាន CNA នៅថ្ងៃទី០១ មីនា ២០២២។

រូបភាពផ្កាយរណបដែលផ្តល់ឲ្យដោយក្រុមហ៊ុន Maxar ជាក្រុមហ៊ុនរបស់អាមេរិក បង្ហាញពីការប្រមូលផ្ដុំរថពាសដែក និងកាំភ្លើងធំដ៏សន្ធឹកដែលចាប់ផ្តើមពីចម្ងាយ 29 គីឡូម៉ែត្រភាគខាងជើងនៃទីក្រុង ខណៈដែលទីក្រុងម៉ូស្គូបានប្រឆាំងនឹងការកើនឡើងសម្ពាធពិភពលោក និងរលកនៃទណ្ឌកម្មអន្តរជាតិដែលបានបំផ្លាញសេដ្ឋកិច្ចរបស់រុស្ស៊ី។

កិច្ចចរចាបទឈប់បាញ់ដំបូងរវាងទីក្រុងមូស្គូ និងទីក្រុងគៀវកាលពីថ្ងៃច័ន្ទ បានបរាជ័យក្នុងការទទួលបានភាពជោគជ័យមួយ ដោយរុស្ស៊ីបានបាញ់ផ្លោងទៅលើតំបន់លំនៅដ្ឋានក្នុងទីក្រុង Kharkiv ទីពីររបស់ប្រទេសអ៊ុយក្រែន និងតំបន់ផ្សេងទៀតនៃប្រទេសបន្ទាប់ពីការចរចា។

កងកម្លាំងប្រដាប់អាវុធអ៊ុយក្រែនបានសរសេរនៅលើ Facebook ថា កងទ័ពរុស្ស៊ីបានប្រមូលផ្តុំ កងកម្លាំងរបស់ខ្លួនឡើងវិញក្នុងរយៈពេល 24 ម៉ោងចុងក្រោយនេះ "ជាចម្បងដើម្បីឡោមព័ទ្ធ និងគ្រប់គ្រងទីក្រុង Kyiv និងទីក្រុងធំៗផ្សេងទៀត"។

រូបភាពទាំងនោះក៏បានបង្ហាញពី "ការដាក់ពង្រាយកងកម្លាំងជើងគោកបន្ថែម និងអង្គភាពឧទ្ធម្ភាគចក្រវាយប្រហារលើដី" នៅភាគខាងត្បូងប្រទេសបេឡារុស្ស ក្បែរព្រំដែនអ៊ុយក្រែន។

គួរបញ្ជាក់ផងដែរថា អភិបាលក្រុង Kharkiv ភាគខាងកើត លោក Igor Terekhov ដែលត្រូវបានដកស្រង់ដោយប្រព័ន្ធផ្សព្វផ្សាយអ៊ុយក្រែន បានព្រមានថា រថពាសដែក និងរថក្រោះរបស់ទីក្រុងមូស្គូ «នៅគ្រប់ទីកន្លែងជុំវិញទីក្រុង»។RT