អូតាវ៉ា៖ ក្រុមមន្ត្រី បាននិយាយកាលពីថ្ងៃចន្ទសប្តាហ៍នេះថា កាណាដាកំពុងប្រឈមមុខនឹងការបំផ្លិចបំផ្លាញដោយសារភ្លើងឆេះព្រៃដ៏អាក្រក់បំផុតមិនធ្លាប់មាន ខណៈ មានការព្យាករថាអាកាសធាតុក្តៅ និងស្ងួតនឹងបន្តរហូតដល់ចុងរដូវក្តៅនៃឆ្នាំ២០២៣នេះ។ បើយោងតាមការចុះផ្សាយដោយទីភា្នក់ងារសារព័ត៌មាន The Thaiger នៅថ្ងៃទី០៦ មិថុនា ឆ្នាំ២០២៣។

កត្តាភ្លើងឆេះព្រៃ គឺជាគ្រោះធម្មជាតិដ៏មហន្តរាយបំផុតទីពីរនៅកាណាដា បន្ទាប់ពីទឹកជំនន់បានបំផ្លាញផ្ទះសម្បែង ប៉ះពាល់ដល់ផលិតកម្មប្រេង និងឧស្ម័ននៅក្នុងខេត្តផលិតប្រេងឆៅដ៏សំខាន់នៃរដ្ឋអាល់បឺតា (Alberta) ដោយបង្កឲ្យមានការបំពុលខ្យល់ ទាំងក្នុងប្រទេសកាណាដា និងសហរដ្ឋអាមេរិក។

ភ្លើងកំពុងឆេះព្រៃកំពុងកើតមាននៅក្នុងខេត្ត និងដែនដីស្ទើរតែទាំងអស់របស់កាណាដា ហើយមន្ត្រីរដ្ឋាភិបាលសហព័ន្ធ បានព្រមានពីការកើនឡើងនូវហានិភ័យ នៃភ្លើងឆេះព្រៃនេះ រហូតដល់ខែសីហា។ អណ្ដាតភ្លើងបាន និងកំពុងរីករាលដាលយ៉ាងឆាប់រហ័ស នៅភាគខាងកើតប្រទេស ដោយបង្ខំឲ្យមានការជម្លៀស ប្រជាជនក្នុងតំបន់ណូវ៉ា ស្កូទីយ៉ា (Nova Scotia) ក៏ដូចជាអ្នករស់នៅតាមបណ្តោឆ្នេរសមុទ្រកេប៉ិក (Quebec)។

គួរបញ្ជាក់ផងដែរថា មានភ្លើងឆេះព្រៃសកម្មចំនួន ៤១៣កន្លែងដែលក្នុងនោះ ២៤៩កន្លែង ត្រូវបានគេចាត់ទុកថាមិនអាចគ្រប់គ្រងបាន ហើយមនុស្សប្រហែល ២៦,០០០នាក់ កំពុងស្ថិតក្រោមការបញ្ជាឲ្យជម្លៀសខ្លួន នៅទូទាំងប្រទេសកាណាដា៕