កាប៊ុល៖ ក្រុមតាលីបង់បានធ្វើការវាយលុកចូលមកជិតទីក្រុងកាប៊ុលនៅថ្ងៃសៅរ៍ទី ១៤ ខែសីហាដោយដណ្តើមបានទីក្រុងសំខាន់មួយនៅជិតរដ្ឋធានីអាហ្វហ្គានីស្ថាននៅពេលដែលកងទ័ពអាមេរិកបានមកដល់ដើម្បីជួយជម្លៀសបុគ្គលិកស្ថានទូតនិងជនស៊ីវិលដទៃទៀត។ នេះបើយោងតាមសេចក្ដីោរាយការណ៍ដោយទីភ្នាក់ងារ CNA

សមាជិកក្រុមប្រឹក្សាខេត្តម្នាក់បាននិយាយថាដោយបន្តការឈានទៅមុខយ៉ាងឆាប់រហ័សក្រុមបះបោរបានដណ្តើមយកទីក្រុង Pul-e-Alam ដែលមានចម្ងាយប្រហែល ៧០ គីឡូម៉ែត្រពីទីក្រុងកាប៊ុលនិងរដ្ឋធានីនៃខេត្ត Logar ។

ការទទួលបានទីក្រុងដែលជាទីតាំងសំខាន់សម្រាប់ការវាយលុកដ៏មានសក្តានុពលលើទីក្រុងកាប៊ុលកើតឡើងមួយថ្ងៃបន្ទាប់ពីក្រុមបះបោរដណ្តើមបានទីក្រុងធំទី ២ និងទី ៣ របស់ប្រទេស។

មន្ទីរប៉ង់តាហ្គោនបាននិយាយថាកងវរសេនាតូចម៉ារីនពីរនិងកងវរសេនាតូចថ្មើរជើងមួយនឹងមកដល់ទីក្រុងកាប៊ុលនៅល្ងាចថ្ងៃអាទិត្យដោយមានការចូលរួមពីកងទ័ពប្រហែល ៣.០០០ នាក់។

មន្ទីរប៉ង់តាហ្គោនបានបន្ថែមថា ក្រុមប្រយុទ្ធនៃកងពលតូចថ្មើរជើងមួយនឹងធ្វើដំណើរចេញពីបន្ទាយ Fort Bragg រដ្ឋ North Carolina ទៅកាន់ប្រទេសគុយវ៉ែតដើម្បីដើរតួជាកម្លាំងប្រតិកម្មរហ័សសម្រាប់សន្តិសុខក្នុងទីក្រុងកាប៊ុលបើចាំបាច់។

គួរបញ្ជាក់ថា ចក្រភពអង់គ្លេសនិងប្រទេសលោកខាងលិចមួយចំនួនផ្សេងទៀតក៏កំពុងបញ្ជូនកងទ័ពផងដែរខណៈការតស៊ូពីកងកម្លាំងរដ្ឋាភិបាលអាហ្វហ្គានីស្ថានបានធ្លាក់ចុះយ៉ាងរហ័សដែលធ្វើអោយ ការវាយលុកលើទីក្រុងកាប៊ុលអាចនៅសល់តែប៉ុន្មានថ្ងៃទៀតប៉ុណ្ណោះ។RT