ភ្នំពេញ ក្រសួងសាធារណការ និងដឹកជញ្ជូន បានលើកឡើងថា ខែឧសភា ឆ្នាំ២០២០ ប្រជាពលរដ្ឋទៅទទួលសេវាប្រឡង ប្តូរ និងពន្យារ មណ្ឌលផ្តល់បណ្ណបើកបរយានយន្ត ផ្សារទំនើបអ៊ីអន១ និងអ៊ីអន២ មានចំនួនសរុប ១១.៧៨១ នាក់។

យោងតាមគេហទំព័រហ្វេសបុករបស់ ក្រសួងសាធារណការ នៅព្រឹកថ្ងៃទី៣ ខែមិថុនា ឆ្នាំ២០២០ថា មណ្ឌលផ្តល់បណ្ណបើកបរនៅផ្សារទំនើបអ៊ីអន១ និងអ៊ីអន២ បានផ្លាស់ប្តូរម៉ោងធ្វើការទៅធម្មតាវិញហើយ(ម៉ោង៩:០០ព្រឹក-១០:០០យប់) និងបានប្រឡង ប្តូរ និងពន្យារបណ្ណបើកបរសរុបប្រមាណ ១១.៧៨១នាក់ក្នុងខែឧសភា។

ក្រសួងបន្ដថា ចាប់ពីថ្ងៃទី១ ខែមិថុនា ឆ្នាំ២០២០ មណ្ឌលផ្តល់បណ្ណបើកបរយានយន្ត ផ្សារទំនើបអ៊ីអន១ និងអ៊ីអន២ ធ្វើការរៀងរាល់ថ្ងៃ ចាប់ពីថ្ងៃចន្ទ ដល់ថ្ងៃអាទិត្យ ចាប់ពីម៉ោង ០៩:០០ ព្រឹក ដល់ម៉ោង ១០:០០យប់ ។ សម្រាប់អគ្គនាយកដ្ឋានដឹកជញ្ជូនផ្លូវគោក ចាប់ពីថ្ងៃចន្ទ ដល់ថ្ងៃសៅរ៍ ចាប់ពីម៉ោង ០៨:០០ព្រឹក ដល់ម៉ោង ០៥:០០ល្ងាច។

សូមរំលឹកថា សម្រាប់ប្រជាពលរដ្ឋមានបំណងចង់ប្តូរ និងពន្យារបណ្ណបើកបរ ត្រូវមានឯកសារដូចជា៖

១. អត្តសញ្ញាណប័ណ្ណសញ្ជាតិខ្មែរ

២. លិខិតបញ្ជាក់កាយសម្បទា(អាចធ្វើនៅទីតាំងផ្ទាល់)

៣. រូបថត ៤x៦ ផ្ទៃពណ៌ស ៣សន្លឹក(ថតនៅទីតាំងផ្ទាល់)

៤. ពាក្យបណ្តឹងបាត់បណ្ណបើកបរបញ្ជាក់ពីប៉ុស្តិ៍រដ្ឋបាល(ក្នុងករណីបាត់បណ្ណបើកបរ)៕