អង្គភាពប្រឆាំងអំពើពុករលួយកោះហៅប្រធានមន្ទីបរិស្ថានខេត្តព្រះវិហារមកបំភ្លឺពាក់ព័ន្ធករណីឃុបឃិតគ្នារវាងឈ្មួញឈើខុសច្បាប់ និងអ្នកឈូសឆាយដីព្រៃដោយខុសច្បាប់
ព្រះវិហារ ៖ អង្គភាពប្រឆាំងអំពើពុករលួយកោះហៅឲ្យចូលបំភ្លឺភាពមិនប្រក្រតី ការលើកឡើងករណីលោក សោម រដ្ឋា មន្ដ្រី នៃមន្ទីរបរិស្ថាន ខេត្តព្រះវិហារ និងសហគមន៍ព្រៃឈើ បានឃុបឃិតគ្នាជាមួយឈ្មួញឈើខុសច្បាប់ និងអ្នកឈូសឆាយ ដីព្រៃដោយខុសច្បាប់ ។បើយោងតាមលិខិតរបស់ អង្គភាពប្រឆាំងអំពើពុករលួយ បានទទួល និងពិនិត្យពាក្យប្ដឹង ដែលបានលើកឡើងថា ឈ្មោះ សោម រដ្ឋា មន្ដ្រីបរិស្ថាន ខេត្តព្រះវិហារ និងសហគមន៍ព្រៃឈើ បានទារប្រាក់ពីឈ្មួញដឹកឈើព្រៃឡង់ ក្នុងមួយគោយន្ដចាប់ពី៨០.០០០រៀល ដល់១០០.០០០រៀល ។អង្គភាពប្រឆាំងអំពើពុករលួយ បានជម្រាបជូនបន្ដថា មន្ដ្រីបរិស្ថាន មានការត្រូវរ៉ូវគ្នាជាប្រព័ន្ធជាមួយឈ្មួញធំម្នាក់នៅភូមិពើក ហើយប្រសិនបើគោយន្ដមិនមែនជាអ្នកលក់ឈើឲ្យឈ្មោះ ឡេង នោះទេ គឺមិនឲ្យដឹកចេញពីភូមិពើក ទោះបីជាគោយន្ដនោះ បានបង់ប្រាក់ចេញពីព្រៃមកក៏ដោយ ក៏មន្ដ្រីបរិស្ថាននៅតែចាប់ឲ្យបង់ប្រាក់ម្ដងទៀតចំនួន១.០០០.០០០រៀល។បើតាមប្រភពដដែលទទួលបាន ឈ្មោះ ឡេង និងឈ្មោះ ឌី កំពុងតែត្រូវរ៉ូវគ្នាបើកដៃឲ្យក្រុមគោយន្ដ ចូលកាប់ឈើទន្ទ្រានបំផ្លិចបំផ្លាញព្រៃឡង់ដោយសេរី ហើយគោយន្ដរបស់ពួកគេចូលទៅអារឈើក្នុងមួយថ្ងៃ៣ជើងទៅ៥ជើង ដោយមានឈ្មោះមេក្លោងឈ្មោះ ឌី ឈ្មោះ រឿន ឈ្មោះ ម៉េត និងឈ្មោះ យាយលែន ជាអ្នកដើរប្រមូលទិញពីអ្នកស្រុកដែលបានចុះទៅអារឈើក្នុងព្រៃ នៅជុំវិញភូមិទ្រា និងភូមិពើក ដោយសហការជាមួយមន្ដ្រីបរិស្ថាន សហគមន៍ព្រៃឈើ និងមន្ដ្រីប៉ុស្ដិ៍នគរបាលរដ្ឋបាល។ប្រភពដដែល បញ្ជាក់ទៀតថា ឈ្មោះ ឆាយ គឹមហូវ មានប្ដីមុខងារជាមេព្រៃ (ផ្នែករដ្ឋបាលព្រៃឈើ) មានឡានសាំយ៉ុង ០២គ្រឿង និងឡានធំកង់១០ ចំនួន០២គ្រឿង កំពុងតែជួញឈើនៅតំបន់ព្រៃឡង់នោះផងដែរ៕
