(វេណេហ្ស៊ុយអេឡា)៖ រដ្ឋមន្ត្រីក្រសួងការងារវ៉េណេស៊ុយអេឡា លោក ហ្វ្រេនស៊ីសកូ តូរៀលបា (Francisco Torrealba) បានប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិថា ទណ្ឌកម្មដែលដាក់ដោយសហរដ្ឋ អាមេរិក កំពុងជំរុញឱ្យជនជាតិវេណេស៊ុយអេឡា កាន់តែច្រើនធ្វើចំណាកស្រុក ទៅកាន់ប្រទេសជិតខាង។នេះបើតាមសេចក្តីរាយការណ៍ដោយទីភ្នាក់ងារសារព័ត៌មាន AFP នៅថ្ងៃទី២១ ខែកញ្ញា ឆ្នាំ២០២២។ 

រដ្ឋមន្ត្រីក្រសួងការងារវ៉េណេស៊ុយអេឡា លោក ហ្វ្រេនស៊ីសកូ តូរៀលបា បានធ្វើការកត់សម្គាល់នៅទីក្រុងហ្សឺណែវ ពេលបង្ហាញរបាយការណ៍របស់ខ្លួន ស្តីពីអនុសញ្ញាអន្តរជាតិស្តីពីការការពារសិទ្ធិពលករចំណាកស្រុកទាំងអស់ និងសមាជិកនៃគ្រួសាររបស់ពួកគេផងដែរ។

លោក ហ្វ្រេនស៊ីសកូ តូរៀលបា បាននិយាយថាការកើន ឡើងនៃការធ្វើចំណាកស្រុក របស់ជនជាតិវេណេស៊ុយអេឡា គឺជាលទ្ធផលនៃគោលនយោបាយឈ្លាន ពានរបស់សហរដ្ឋ អាមេរិក ដោយផ្អែកលើការដាក់ទោសទណ្ឌនៃវិធានការបង្ខិតបង្ខំឯកតោភាគីខុសច្បាប់ ដែលស្វែងរកការបំផ្លាញសន្តិភាព ស្ថិរភាពសង្គម និងសេដ្ឋកិច្ចនៃប្រទេសរបស់ពួកគេ។ ទាក់ទងនឹងស្ថានភាពពលករចំណាកស្រុកនៅវេណេស៊ុយអេឡា លោក តូរៀលបា (Torrealba) បានបន្ត ពួកគេត្រូវបានយកចិត្តទុកដាក់ក្រោមគោលការណ៍នៃ ការរួមបញ្ចូលសង្គម សាមគ្គីភាព យុត្តិធម៌ សមភាពសង្គម និងសមភាពយេនឌ័រផងដែរ៕