ភ្នំពេញ ៖ សមាគមអ្នកបង្កើតមាតិកាលើអ៊ីនធឺណេតនៅកម្ពុជា បានផ្ញើរសារលិខិតអបអរសាទរ លោក អ៊ីវ វាសនា សមាជិកក្រុមប្រឹក្សាភិបាល ដែលទទួលបានសំលេងឆ្នោតច្រើនជាងគេ និងលោក ហាក់ លាងហ៊ ដែលត្រូវបានជ្រើសតាំងជាប្រធានសមាគម ក្នុងអាណត្តិទី៩ នៃសមាគមភស្តុភារកម្មកម្ពុជា (CLA)។

សូមរំលឹកថា កាលពីថ្ងៃទី៣០ ខែមេសា ឆ្នាំ២០២៤ សមាគមភស្តុភារកម្មកម្ពុជា បានរៀបចំមហាសន្និបាតលើកទី២០ និងរៀបចំការបោះឆ្នោតជ្រើសរើសក្រុមប្រឹក្សាភិបាលអាណត្តិទី៩ (ឆ្នាំ២០២៤-២០២៦) ដោយមានការអញ្ជើញចូលរួមពីក្រុមប្រឹក្សាភិបាលអាណត្តិទី៨ ទីប្រឹក្សា គ្រូបង្គោល សមាជិក និងលេខាធិការសមាគមទាំងអស់ ប្រមាណជិត ២០០នាក់។

ជាលទ្ធផល នៃការបោះឆ្នោតជ្រើសរើសសមាជិកក្រុមប្រឹក្សាភិបាលអាណត្តិទី៩ ថ្មីសមាជិកសមាគមបានបោះឆ្នោតជូន លោក អ៊ីវ វាសនា ទទួលបានសំឡេងច្រើនជាងគេក្នុងចំណោមបេក្ខជនសរុបចំនួន១៣រូប។

នារសៀលថ្ងៃខែឆ្នាំដដែល  លោក អ៊ីវ វាសនា សមាជិកក្រុមប្រឹក្សាភិបាលអាណត្តិទី៩ ដែលទទួលបាន   សំលេងគាំទ្រច្រើនជាងគេក្លាយជាប្រធានក្រុមប្រឹក្សាភិបាលអាណត្តិទី៩ បានដឹកនាំកិច្ចប្រជុំក្រុមប្រឹក្សាភិបាលលើកទី១ ដើម្បីធ្វើការជ្រើសរើស បែងចែកតួនាទី ភារកិច្ច ជូនដល់សមាជិកក្រុមប្រឹក្សាភិបាលថ្មីទាំងអស់ទៅតាមតួនាទីរៀងៗខ្លួន៕