ក្លិប True Bangkok United បានប្រកាសអំពីការបង្ហាញមុខសមាជិកថ្មី ៣រូបសម្រាប់ពង្រឹងសមត្ថភាពក្រុមទាំងក្នុងលីគកំពូលថៃ ក្រោយពីបានកៅអីប្រកួតវគ្គជម្រុះនៃពានរង្វាន់ AFC Champion League 2019 ផងដែរ។ សមាជិកថ្មី ៣រូបសុទ្ធសឹងតែជាកីឡាករក្នុងស្រុកទាំងអស់ ពោលគឺកីឡាករ Tristan Do និងកីឡាករ Peerapat Notchaiya មកពីក្លិប Maungthong United និងកីឡាករ Anon Amornlerdsak មកពីក្លិប Bangkok Glass ផងដែរ។

 ១ កីឡាករ Tristan Do : ក្នុងនាមជាខ្សែបម្រើរូបគេធ្លាប់បានប្រកបអាជីពនៅបារាំងជាមួយក្រុម Lorient ប៉ុន្ដែមិនបានបង្ហាញខ្លួននោះទេ ក៏បន្តចូលរួមជាមួយ SAS Épinal, Gazélec Ajaccio មុនត្រលប់មកចូលរួមនៅលីគកំពូលថៃជាមួយក្រុម BEC Tero Sasana ហើយក៏ផ្លាស់មកកាន់ក្លិប Muangthong United បង្ហាញខ្លួនបាន ៨៨ប្រកួត ទាត់ចូលទីបាន ៩គ្រាប់ផងដែរ។ សម្រាប់ក្រុមជម្រើសជាតិវិញ ម្ចាស់អាវលេខ៧ថ្មីរូបនេះ ធ្លាប់ចូលលេងឈុត U-23 និងឈុតធំផងដែរ។

 ២ កីឡាករ Peerapat Notchaiya: កីឡាករវ័យ ២៥ឆ្នាំរូបនេះ ជាយុវជនថ្នាលរបស់ Suphanburi Sport School និង Police United ( បច្ចុប្បន្នប្ដូរមកឈ្មោះ BEC Tero Sasana ) ហើយក៏បានឡើងមកលេងឈុតធំឲ្យក្រុមនាឆ្នាំ ២០១២ មុនផ្លាស់មក ក្លិប Muangthong United នៅក្នុងឆ្នាំ ២០១៦ ដោយបានបង្ហាញខ្លួនចំនួន ៦៨លើក ទាត់ចូលបាន ៣គ្រាប់ផងដែរ។ ចំណែកនៅក្នុងក្រុមជម្រើសជាតិវិញ រូបគេធ្លាប់ជាប់តាំងពីឈុត U-19, U-23 និងក្រុមឈុតធំផងដែរ។

 ៣ កីឡាករ Anon Amornlerdsak : ក្នុងនាមជាខ្សែបម្រើប្រយុទ្ធ កើតចេញពីថ្នាលយុវជនរបស់ក្លិប Buriram United រូបគេបានដំឡើងមកកាន់ឈុតធំនាឆ្នាំ ២០១៤ និងបានបព្ចេញឲ្យក្លិប Surin City ខ្ចីជើងនាឆ្នាំ ២០១៤ដដែលនោះ ហើយក៏បានបន្តទៅរួមរស់ជាមួយក្លិប Bangkok Glass នាឆ្នាំ ២០១៨ ផងដែរ។ សម្រាប់ក្រុមជម្រើសជាតិ ខ្សែបម្រើប្រយុទ្ធវ័យ ២០ឆ្នាំរូបនេះ ធ្លាប់ចូលលេងក្នុងឈុត U-19, U-21, U-23 និងឈុតធំ។

គួរបញ្ជាក់ថា ក្លិប True Bangkok United នារដូវកាល ២០១៨នេះពិតជាធ្វើបានល្អមែនទែន បើទោះបីត្រឹមជាជើងឯករងលីគកំពូលថៃក៏ដោយ ក្រោយធ្វើការប្រកួតចំនួន ៣៤លើកក្នុងនោះឈ្នះ ២១លើក ស្មើ ៨លើក និងចាញ់ ៥លើក មាន ៧១ពិន្ទុ និងបានធ្វើការប្រកួតជម្រុះក្នុងពានរង្វាន់ AFC Champion League 2019 ផងដែរ៕