កូរ៉េខាងត្បូង៖ យោធាកូរ៉េខាងត្បូង បានប្រកាសនៅថ្ងៃចន្ទនេះថា ខ្លួនបានរកឃើញសញ្ញាបង្ហាញថា កូរ៉េខាងជើងកំពុងរៀបចំបញ្ជូនកងទ័ព សព្វាវុធ និងយន្តហោះគ្មានមនុស្សបើក (ដ្រូន) បន្ថែមទៀតទៅកាន់ប្រទេសរុស្ស៊ី ដើម្បីជួយក្នុងសង្គ្រាមប្រឆាំងនឹងអ៊ុយក្រែន។

អគ្គសេនាធិការចម្រុះរបស់កូរ៉េខាងត្បូង (JCS) ឱ្យដឹងថា ក្រុងព្យុងយ៉ាងបានផ្តល់ឧបករណ៍បាញ់គ្រាប់រ៉ុក្កែត ២៤០ មីលីម៉ែត្រ និង អាវុធស្វ័យប្រវត្តិ ១៧០ មីលីម៉ែត្រ ដល់រុស្ស៊ីរួចហើយ ហើយកំពុងរៀបចំផលិតដ្រូនបន្ថែមទៀត ក្រោយពីមេដឹកនាំ គីម ជុងអ៊ុន បានដឹកនាំការធ្វើតេស្តកាលពីខែមុន។

មន្ត្រីអគ្គសេនាធិការចម្រុះរបស់កូរ៉េខាងត្បូង JCS បញ្ជាក់ថា «យន្តហោះដ្រូនអត្តឃាត គឺជាកិច្ចការមួយដែលលោក គីម ជុងអ៊ុន បានផ្តោតលើ និងថា កូរ៉េខាងជើងបានបង្ហាញចេតនាចង់ផ្តល់ដ្រូនទាំងនោះទៅឱ្យរុស្ស៊ី»។យន្តហោះគ្មានមនុស្សបើកបែបនេះត្រូវបានប្រើប្រាស់យ៉ាងទូលំទូលាយនៅក្នុងសង្គ្រាមអ៊ុយក្រែន ហើយលោក Kim បានបញ្ជាឱ្យផលិតអាវុធបាញ់លើអាកាស

ក្នុងនោះផងដែរ ក្រុងសេអ៊ូល វ៉ាស៊ីនតោន និង ក្រុងកៀវ បាននិយាយថា មានទាហានកូរ៉េខាងជើងប្រហែល ១២ ០០០ នាក់នៅក្នុងប្រទេសរុស្ស៊ី។

អគ្គសេនាធិការចម្រុះរបស់កូរ៉េខាងត្បូងJCS បាននិយាយថា យ៉ាងហោចណាស់ ១,១00 នាក់ក្នុងចំណោមពួកគេ ត្រូវបានសម្លាប់ ឬរងរបួស ស្របតាមរាបាយការណ៍សង្ខេបកាលពីសប្តាហ៍មុនដោយទីភ្នាក់ងារចារកម្មរបស់ប្រទេសកូរ៉េខាងត្បូង ដែលបានរាយការណ៍ថាមានមនុស្សស្លាប់ប្រហែល ១00 នាក់ និង ១,000 នាក់ផ្សេងទៀតបានរងរបួសនៅក្នុងតំបន់ Kursk ។

មន្ត្រី អគ្គសេនាធិការចម្រុះរបស់កូរ៉េខាងត្បូងJCS ព្រមានថា ទំនាក់ទំនងយោធាកាន់តែជិតស្និទ្ធរវាងព្យុងយ៉ាង និងមូស្គូ អាចបង្កការគំរាមកំហែងកាន់តែខ្លាំងដល់សេអ៊ូល ខណៈកូរ៉េខាងជើងកំពុងធ្វើទំនើបកម្មកងកម្លាំងខ្លួន និងទទួលបានបទពិសោធន៍ប្រយុទ្ធបន្ថែមទៀត៕