ភ្នំពេញ ៖ ឆ្លើយតបទៅ នឹងក្រសួងការបរទេសអាមេរិក ដែលបានសម្រេចផ្ដល់ពានរង្វាន់ ដល់បុគ្គលល្មើសច្បាប់មួយរូប នៅកម្ពុជា លោក អាន សុខខឿន អ្នកនាំពាក្យក្រសួងការបរទេសខ្មែរ បានបញ្ជាក់ថា ពានរង្វាន់នេះ មិនមែនជាមធ្យោបាយស្របច្បាប់ សម្រាប់ការពារខ្លួន ក្នុងតុលាការរបស់ប្រទេសណាមួយឡើយ ។

ក្រសួងការបរទេសអាមេរិក បានផ្តល់ពានរង្វាន់អ្នកការពារសិទ្ធិមនុស្សសកលប្រចាំឆ្នាំឲ្យអ្នកការពារសិទ្ធិមនុស្ស១០នាក់ នៅជុំវិញពិភពលោក ក្នុងនោះក៏មាន កញ្ញា ឈឹម ស៊ីថរ ជាប្រធានសហជីព ណាហ្គាវើលដ៍ កំពុងជាប់ពន្ធនាគារព្រៃស ។ កញ្ញាគឺជាដឹកនាំធ្វើបាតុកម្មតវ៉ា នឹងការបញ្ឈប់បុគ្គលិកណាហ្គា កន្លងមក។

តាមរយៈសេចក្ដីថ្លែងការណ៍ នាថ្ងៃទី២ កុម្ភៈ ដដែលនេះ អ្នកនាំពាក្យក្រសួង ការបរទេសលោក អាន សុខខឿន បានលើកឡើងពាក់ព័ន្ធ ការសម្រេចផ្តល់ ពានរង្វាន់ ដល់បុគ្គលល្មើសច្បាប់មួយរូប នៅកម្ពុជា របស់ក្រសួងការបរទេសអាមេរិកថា ពានរង្វាន់ជារឿយៗ គឺសម្រាប់ទទួល ស្គាល់បុគ្គល ដែលតស៊ូ ដើម្បីសន្តិភាព ភាពសុខដុមរមនា និងការបង្រួបបង្រួមជាតិ ការកាត់បន្ថយសព្វាវុធ ការលុបបំបាត់ការរើសអើង អំពើហិង្សា និងការស្អប់ខ្ពើមជាតិសាសន៍ ឬក៏បង្កើតស្នាដៃណាមួយសម្រាប់សង្គម ជាដើម ។

លោក បន្តថា ចំណាត់ការផ្លូវច្បាប់ ចំពោះបុគ្គលរូបនោះ ពុំពាក់ព័ន្ធនឹងសិទ្ធិមនុស្ស ឬក៏វិវាទការងារទេ ប៉ុន្តែគឺដោយសារការបំពានជាក់ស្តែងលើបម្រាម មិនឲ្យចាកចេញពីដែនដីកម្ពុជា ខណៈកំពុងស្ថិតក្រោមការត្រួតពិនិត្យតាមផ្លូវតុលាការ ។ មាត្រា ២៣០ នៃក្រមនីតិវិធីព្រហ្មទណ្ឌរបស់ម្ពុជា បានចែងថា «ប្រសិនបើជនត្រូវចោទ បានគេចវេះ ដោយចេតនា ពីកាតព្វកិច្ចត្រួតពិនិត្យ តាមផ្លូវតុលាការ ចៅក្រមស៊ើបសួរអាចសម្រេច ឲ្យឃុំខ្លួនជនត្រូវចោទ បណ្តោះអាសន្នបាន»។

អ្នកនាំពាក្យបញ្ជាក់ថា «ពានរង្វាន់នេះមិនមែនជាមធ្យោបាយ ស្របច្បាប់សម្រាប់ការពារខ្លួន នៅក្នុងតុលាការរបស់ប្រទេសណាមួយឡើយ។ មធ្យោបាយស្របច្បាប់គឺការចូលរួមក្នុងដំណើរការកាត់ក្ដី និង ផ្តល់ទឡ្ហីករណ៍ផ្លូវច្បាប់ ជាមួយភស្តុតាងរឹងមាំ ដើម្បីដោះបន្ទុកនៅក្រោមច្បាប់ និងនីតិវិធីតុលាការ របស់រដ្ឋពាក់ព័ន្ធ» ។

សូមរំលឹកថា កញ្ញា ឈឹម ស៊ីថរ ត្រូវបានសមត្ថកិច្ចចាប់ខ្លួនលើកទី២ កាលពីថ្ងៃទី២៦ ខែវិច្ឆិកា ឆ្នាំ២០២២ បញ្ជូនទៅពន្ធនាគារព្រៃស បន្ទាប់ពីត្រឡប់មកពីការចូលរួមកិច្ចប្រជុំ នៅអូស្ត្រាលី ក្រោយពីកញ្ញាត្រូវបានចាប់ខ្លួនលើកទី១ កាលពីដើមខែមករា ឆ្នាំ២០២២ ក្នុងពេលកញ្ញាដឹកនាំធ្វើកូដកម្ម ដោយខុសច្បាប់ ហើយត្រូវបានឃុំជាបណ្ដោះអាសន្ន ក្នុងពន្ធនាគាររយៈពេល ២ខែ តែត្រូវបានដោះលែង ឲ្យនៅក្រៅឃុំវិញ កាលពីខែមីនា ឆ្នាំ២០២២៕EB