សហរដ្ឋអាមេរិក នឹងប្រគល់រូបចម្លាក់ «ដងខ្លួនព្រះនារាយណ៍ ដែលមានព្រះហស្ត ៤»នៅចុងឆ្នាំ២០២២នេះ
ភ្នំពេញ៖សហរដ្ឋអាមេរិក បានប្រគល់រូបចម្លាក់ «ដងខ្លួនព្រះនារាយណ៍ ដែលមានព្រះហស្ត ៤» ធ្វើពីថ្មភក់ លំនាំរចនាប័ទ្មសម័យមុនអង្គរមួយទៀត ជូនដល់ប្រជាជនកម្ពុជាវិញ ហើយត្រូវបានគេរំពឹងថា នឹងត្រូវធ្វើមាតុភូមិនិវត្តន៍មកកម្ពុជាវិញ នៅចុងឆ្នាំ ២០២២ នេះ ជាមួយនឹងរូបសំណាកប្រមាណ ៣០ ដុំទៀត ដែលត្រូវបានប្រគល់ត្រឡប់មកវិញដោយសហរដ្ឋអាមេរិក។
លោក ហួត សំណាង ប្រធាននាយកដ្ឋានបុរាណវត្ថុ នៃអគ្គនាយកដ្ឋានបេតិកភណ្ឌ ក្រសួងវប្បធម៌ និង វិចិត្រសិល្បៈ បានប្រាប់ ភ្នំពេញ ប៉ុស្តិ៍ថា ពិធីចុះហត្ថលេខាលើកិច្ចព្រមព្រៀងប្រគល់ទទួលរូបចម្លាក់វត្ថុបុរាណខ្មែរដ៏មានវ័យចំណាស់ «ដងខ្លួនព្រះនារាយណ៍ ដែលមានព្រះហស្ត៤» នោះ ត្រូវបានធ្វើឡើង កាលពីព្រឹកថ្ងៃទី ២ ខែវិច្ឆិកា ឆ្នាំ ២០២២ នៅការិយាល័យរដ្ឋអាជ្ញាទីក្រុងញូវយ៉ក ដោយមានលោក កែវ ឈា ឯកអគ្គរាជទូតកម្ពុជាប្រចាំសហរដ្ឋអាមេរិក ជាតំណាងរាជរដ្ឋាភិបាលកម្ពុជា និងលោក Thomas Acocella ជាតំណាងរដ្ឋអាជ្ញាក្រុងញូវយ៉ក។
បំណែកនៃរូបចម្លាក់ «ដងខ្លួនព្រះនារាយណ៍ ដែលមានព្រះហស្ត៤» ត្រូវបានគេលួចពីប្រាសាទមួយនៅភាគខាងកើតនៃប្រទេសកម្ពុជានាដើមទសវត្សរិ៍ឆ្នាំ១៩៩០ តាមទិសដៅរបស់ DORIS WIENER ដែលជាអ្នកជួញដូរវត្ថុបុរាណដ៏ល្បីល្បាញ។ នេះបើយោងតាមសេចក្ដីប្រកាសព័ត៌មានរបស់ រដ្ឋអាជ្ញាស្រុក Manhattan នៃក្រុងញូវយ៉ក សហរដ្ឋអាមេរិក កាលពីថ្ងៃទី២ ខែវិច្ឆិកា ឆ្នាំ២០២២។
តាមរយៈសេចក្ដីប្រកាសនោះ បំណែកនៃរូបចម្លាក់ខាងលើនេះ ត្រូវបាន WIENER និងអ្នករួមគំនិតផ្សេងទៀត រៀបចំផ្គុំស្ដារឡើងវិញ ហើយនៅទីបំផុតត្រូវបានរត់ពន្ធចូលទៅក្នុងស្រុក Manhattan ក្នុងឆ្នាំ១៩៩៥ តាមរយៈប្រទេសថៃ។ បន្ទាប់ពីរូបចម្លាក់នោះបានមកដល់ Manhattan, WEINER បានលក់វា ទៅឱ្យអ្នកប្រមូលឯកជន៕
