ភ្នំពេញ៖ ជនជាតិវៀតណាមម្នាក់ ត្រូវកម្លាំងជំនាញនៃមន្ទីរប្រឆាំងគ្រឿងញៀនកម្ពុជាឃាត់ខ្លួនបញ្ជូនទៅតុលាការ ក្រោយរកឃើញជួញដូរគ្រឿងញៀនជាង៥គីឡូក្រាមនៅជិតវិទ្យាស្ថានជាតិប៉ាស័រកម្ពុជា។ នេះបើតាមមន្ទីរប្រឆាំងគ្រឿងញៀនកម្ពុជា បញ្ជាក់នៅព្រឹកថ្ងៃទី១៦ ខែមិថុនា ឆ្នាំ២០២៤។
មន្ទីរប្រឆាំងគ្រឿងញៀនអះអាងថា កម្លាំងជំនាញពាក់ព័ន្ធ ចុះស្រាវជ្រាវស៊ើបអង្កេតរហូតឈានទៅបង្ក្រាបករណីជួញដូរ-រក្សាទុក ដោយខុសច្បាប់នូវសារធាតុញៀន ស្ថិតនៅចំណុច តាមផ្លូវព្រះមុនីវង្ស (ជិតវិទ្យាស្ថានជាតិប៉ាស័រកម្ពុជា) សង្កាត់ស្រះចក ខណ្ឌដូនពេញ រាជធានីភ្នំពេញ។
ប្រតិបត្តិការនោះ កម្លាំងជំនាញឃាត់ខ្លួនជនសង្ស័យម្នាក់ ឈ្មោះ ចាំង យ៉ាំងតង (TRANG VANG TOAN) ភេទប្រុស អាយុ៣៣ឆ្នាំ ជនជាតិវៀតណាម។ ចាប់យកវត្ថុតាងរួមមានគ្រឿងញៀនប្រភេទអ៊ិចស្តាស៊ី (MDMA) ទម្ងន់៥គីឡូ និង៤២៧,០៧ក្រាម។ ប្រភពបន្ថែមថា ក្រោយឃាត់ខ្លួនជនសង្ស័យ និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូន ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់៕
