មីយ៉ាន់ម៉ា ៖ ក្រុមប្រដាប់អាវុធជនជាតិភាគតិចការ៉ែន អះអាងនៅក្នុងសេចក្តីថ្លែងការណ៍មួយថា រដ្ឋាភិបាលយោធាបន្តវាយប្រហារតាមផ្លូវអាកាសសំដៅលើតំបន់ជនស៊ីវិល ទោះបីជាប្រជាជនកំពុងរងគ្រោះយ៉ាងខ្លាំងដោយសារគ្រោះរញ្ជួយដីក៏ដោយ។នេះបើតាមការចេញផ្សាយដោយសារព័ត៌មាន Reuters នៅថ្ងៃទី៣១ ខែមីនា ឆ្នាំ២០២៥។

 ក្រុមចលនាប្រដាប់អាវុធប្រឆាំងរបបសឹកមួយអះអាងថា៖«ក្នុងកាលៈទេសៈដ៏ស្មុគស្មាញ និងវេទនាបែបនេះ របបយោធា គួរតែផ្តល់អាទិភាពដល់កិច្ចខិតខំប្រឹងប្រែងជួយសង្គ្រោះ ប៉ុន្តែផ្ទុយទៅវិញ គឺរបបនេះផ្តោតលើការដាក់ពង្រាយកងកម្លាំង ដើម្បីវាយប្រហារប្រជាជនរបស់ខ្លួនឯងទៅវិញ»។

 ភ្លាមៗបន្ទាប់ពីសោកនាដកម្មនៃគ្រោះរញ្ជួយដីដ៏សាហាវ យន្តហោះយោធាបានបើកការវាយប្រហារតាមអាកាស និងការវាយប្រហារដោយយន្តហោះគ្មានមនុស្សបើកនៅក្នុងរដ្ឋការ៉ែន។

គួរបញ្ជាក់ថា ក្រុមប្រដាប់អាវុធសហភាពជាតិការ៉ែន (KNU) ជាក្រុមដែលតែងតែប្រកាសទាមទារអធិបតេយ្យភាពរបស់ក្រុមខ្លួនពីរដ្ឋាភិបាលមីយ៉ាន់ម៉ាតាំងពីប្រទេសនេះទទួលឯករាជ្យពីចក្រភពអង់គ្លេសមកម្ល៉េះ ហើយជាញឹកញាប់ ក្រុម KNU រាយការណ៍ថា ក្រុមរដ្ឋាភិបាលមីយ៉ាន់ម៉ាធ្វើការវាយប្រហារ និងសម្លាប់ជនជាតិភាគតិចការ៉ែនផងដែរ។ បើតាមការរាយការណ៍កន្លងមក ក្រុមសហភាពជាតិការ៉ែន (KNU) ធ្លាប់មានសមាជិកទ័ពរបស់ខ្លួនជាង ១៤ ០០០ នាក់ ដើម្បីទប់ទល់នឹងការវាយប្រហារ និងនៅក្នុងជម្លោះរវាងយោធាកន្លងមក៕